İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 753 Hüküm no: 914 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mansız v. Serkis’in torunu Avak v. Toros’a bazı mülklerini satıp dokuz adet tarlasının da kullanım hakkını devrettiği Bey‘. Vilâyet-i Anadolu’da Divriği kazâsına tâbi‘ Kesme nâm karyede Mansız v. Serkis nâm Ermeni meclis-i şer‘-i hatîrde oğlunun oğlu Avak v. Toros nâm Ermeni muvâcehesinde ikrâr ve i‘tirâf edip karye-i mezbûrede vâki‘ bir tarafı Manuk v. Mardiros mülküne ve bir tarafı Osman b. Abdullah mülküne ve bir tarafı Onnik mülküne ve bir tarafı tarîk-i âmla mahdûd mülk menzilimin nısf-ı şâyi‘ini ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd Halabağı demekle ma‘rûf bir kıt‘a bağ ve Çayırbağı demekle ma‘rûf bir kıt‘a bağ ki cem‘an iki kıt‘a mülk bağımın nısf-ı şâyi‘asını safka-i vâhide ile mezbûr Avak’a bâtten elli kıt‘a riyâlî guruşa bey‘ ol dahi vech-i muharrer üzere iştirâ ve kabûl eyledikden sonra yine karye-i mezbûre sınırı dâhilinde mevâzi‘-i adîdede her birinin hudûdu ma‘lûm Keler Tarlası demekle ma‘rûf bir kıt‘a tarla ve Hızırşah Tarlası demekle ma‘rûf bir kıt‘a tarla ve Necas Tarlası demekle ma‘rûf bir kıt‘a tarla ve Çayır Tarlası demekle ma‘rûf iki kıt‘a tarla ve Çukur demekle ma‘rûf bir kıt‘a tarla ve Atmalı Tarlası demekle ma‘rûf bir kıt‘a tarla ve Baban Tarlası demekle ma‘rûf bir kıt‘a tarla ki cem‘an dokuz kıt‘a tarlalarımın nısf-ı şâyi‘ini dahi mezbûr Avak’a ma‘rifet-i sahib-i arz ile elli kıt‘a riyâlî guruşa ferâğ ve tefvîz ol dahi tefevvüz ve kabûl eyledikden sonra semen-i mezbûr elli guruş ve bedel-i mezkûr elli guruş ki cem‘an yüz riyâlî guruşu mezbûr Avak yedinden bi’t-tamam ahz u kabz eyledim ba‘de’l-yevm mezbûr Avak’ın emlâk-i mezbûrenin nısf-ı şâyi‘i müşterâsı ve arâzi-i mezkûrenin nısf-ı şâyi‘i dahi tefevvüz olunup mahâllinde kabz ve tasarrufa mezbûr Avak’ı taslît eyledim dedikde keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Rasûl Baba b. Rıdvan, Mustafa el-muhzır, Mehmed b. Mehmed.