İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 754 Hüküm no: 915 Orijinal metin no: [118a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Ester bt. Sabatay’ın alacak hususunda boşandığı kocası Abraham v. İsak ile birbirlerinin zimmetlerini ibra ettikleri İbrâ. Mahmiye-i İstanbul’da Tahtaminâre mahallesinde Ester bt. Sabatay Yahûdî meclis-i şer‘-i hatîr-i lâzımü’t-tevkīrde Samatya cemâ‘atinden işbu râfi‘u’s-sifr Abraham v. İsak nâm Yahûdî mahzarında ikrâr ve takrîr-i kelâm edip mezbûr Abraham zevcim olup beni talâk-ı bâyin ile tatlîk eyledikde zimmetinde olan yirmi kıt‘a riyâlî guruş hakkımı mezbûr Abraham yedinden bi’t-tamam ve’l-kemâl alıp kabz edip husûs-ı zevciyete müte‘allika cemî‘ da‘vâ ve mütâlebâtdan her birimiz âharın zimmetini ibrâ ve ıskāt eyledik dedikde mukırre-i merkūme Ester’in minvâl-i muharrer üzere cârî ve sâdır olan ikrâr-ı meşrûhasını el-mukarru-lehu’l-merkūm Abraham bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fî-selhi Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çavuş b. Abdullah, Abdi Çelebi b. Hüseyin, Şükrullah Beşe b. Mustafa, Osman Bölükbaşı b. Abdullah.