İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 754 Hüküm no: 916 Orijinal metin no: [118a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Bosna Defterdârı Alahoz Mehmed Efendi’nin bahçesinin varisi tarafından Mehmed Ağa’ya satıldığının ispat olunduğu Hüccet-i takās. Vilâyet-i Rumeli’nde bundan akdem Bosna defterdârı iken vefât eden Alahoz Mehmed Efendi’nin li-ebeveyn kız karındaşı ve hasran vârisesi olan Âişe Hatun bt. ( ) meclis-i şer‘-i hatîrde bâ‘isü’l-kitâb kıdvetü’l-emâcid ve’l-a‘yân Mehmed Ağa b. Bektaş Ağa mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi’den irs-i şer‘le intikāl edip mülk-i mevrûsum olan Rumelihisarı kurbünde Balta Limanı demekle ma‘rûf mevzi‘de vâki‘ lede’l-ahâlî ve’l-cîrân ma‘lûmü’l-hudûd bahçemi mezbûr Mehmed Ağa bi-gayr-ı vech-i şer‘î zabt ve tasarruf eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Mehmed Ağa cevâbında yedinde olan hüccet-i şer‘iye mûcebince müteveffâ-yı mezbûr Mehmed Efendi zimmetinde üç yük yetmiş dokuz bin sekiz yüz kırk beş akçe hakkım olduğu mezbûre Âişe Hatun mukırre olmağla mârrü’z-zikr bahçemi târih-i kitâbdan dört sene mukaddem bana altı yük [akçeye] bâtten bey‘ ve teslîm edip ben dahi minvâl-i muharrer üzere iştirâ ve kabz eyledikden sonra semeni olan meblağ-ı mezbûrdan iki yük yirmi bin yüz elli beş akçesin mezbûreye def‘ ü teslîm edip bâkīsi olan üç yük yetmiş dokuz bin sekiz yüz kırk beş akçesi müteveffâ-yı mezbûr zimmetinde hakkım olan üç yük yetmiş dokuz bin sekiz yüz kırk beş akçeye takās edip mezbûre Âişe dahi mukāssa ve kabûl eyledi ol vechile zikrolunan bahçe mülk-i müşterâm olmuşdur deyü def‘le mukābele edecek gıbbe’l-istintâk ve’l-inkâr mezbûr Mehmed Ağa’dan def‘-i mezbûreyi mübeyyine beyyine taleb olundukda udûl-i Müslimînden olup mahmiye-i İstanbul’da Tahtaminâre mahallesi sâkinlerinden İsmail Beşe b. Cafer ve elli sekizinci ağa bölüğüne mahsûs odadan Hamza Beşe b. Halil nâm râcilin li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mârrü’z-zikr bahçeyi mezbûre [118b] Âişe Hatun vech-i muharrer üzere huzûrumuzda mezbûr Mehmed Ağa’ya altı yük akçeye bâtten bey‘ ve teslîm edip ol dahi iştirâ ve kabz eyledikden sonra semeni olan meblağ-ı mezbûr altı yük akçeden iki yük yirmi bin yüz elli beş akçesin nakden mezbûre Âişe Hatun’a def‘ ü teslîm edip bâkīsi olan üç yük yetmiş dokuz bin sekiz yüz kırk beş akçesin dahi yedinde olan hüccet-i şer‘iye mûcebince müteveffâ-yı mezbûr Mehmed Efendi zimmetinde olan üç yük yetmiş dokuz bin sekiz yüz kırk beş akçeyi mezbûre Âişe Hatun mukırre olmağla takās edip ol dahi mukāssa ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûre Âişe Hatun bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Mehmed Efendi b. ( ) Handanzâde, Mehmed Ağa b. Mahmud, el-Hâc Hüseyin b. Receb, Ramazan Beşe b. Ramazan, Mehmed Ağa b. ( ) kethudâ bey, Mehmed Çelebi b. Abdullah, Yusuf Beşe b. Abdullah, Mehmed Efendi b. Mehmed, İsa Ağa, Hasan Efendi b. Abdi Beşe, Ahmed Ağa b. Ayas, Aydın Beşe er-râcil.