İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 755 Hüküm no: 917 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Yusuf b. Hüseyin’in Derviş b. Süleyman Bey’de olan alacağına İbrahim Çelebi b. Süleyman Çelebi’nin kefil olduğu Hüccet-i kefâlet. Mahmiye-i İstanbul’da Yarhisar mahallesinde merhûm Osmanzâde Mehmed Efendi menzilinde sâkin işbu râfi‘u’l-kitâb el-Hâc Yusuf b. Hüseyin meclis-i şer‘-i hatîrde Vilâyet-i Anadolu’da İznik kasabasında Eşrefzâde mahallesi câmi‘i (Eşrefzâde Câmi‘i mahallesi) sükkânından fahrü’l-emâsil ve’l-akrân İbrahim Çelebi b. Süleyman Çelebi mahzarında üzerine da‘vâ ve takrîr-i kelâm edip [mahalle-i] mezbûre sükkânından fahrü’l-a‘yân Derviş b. Süleyman Bey nâm kimesne zimmetinde karz-ı şer‘îden beş yüz kıt‘a esedî guruş ve yedinden müşterâ ve makbûz çuka-bahâsından dahi altmış esedî guruş ki cem‘an beş yüz altmış esedî guruş hakkım olup meblağ-ı mezbûra merkūm İbrahim Çelebi emr ve kabûlü hâviye kefâlet-i sahîha-i şer‘iye ile kefîl olmuş idi suâl olunup takrîri tahrîr ve sûreti yedime verilmek murâdımdır dedikde gıbbe’s-suâl mezbûr İbrahim Çelebi cevâbında fi’l-vâki‘ merkūm el-Hâc Yusuf’un mersûm Derviş Bey zimmetinde minvâl-i meşrûh üzere mukarrer olan beş yüz altmış esedî guruşa emr ve kabûlü hâviye kefâlet-i sahîha-i şer‘iye ile kefîl oldum dedikde mâ hüve’l-vâki‘ bi’t-taleb ketb olundu. Fî-gurreti Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-kuzât Hüseyin Efendi, Yusuf Bey b. Abdullah, Mehmed Çelebi b. Abdülbaki, İsmail b. Mehmed ve gayruhum.