İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 756 Hüküm no: 919 Orijinal metin no: [118b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Navluncu taifesinin alacaklarını tahsil etmek üzere Mehmed Çelebi b. Hüseyin’i vekil tayin ettikleri Vekâlet. Navluncu tâifesinden el-Hâc Ramazan ve Hızır Beşe b. Hudâverdi ve el-Hâc Murad b. Yusuf ve Nasuh Beşe b. Hudâverdi nâm kimesneler meclis-i şer‘de hâfızü’l-vesîka Mehmed Çelebi b. Hüseyin mahzarında her biri takrîr-i kelâm edip mukaddemâ gaybet eden Ekmekci Behram v. Kasber nâm Ermeni ile sulbî oğlu Kasber nâm Ermeni zimmetlerinde buğday semeninden olan akçelerimizi mezbûrândan da‘vâ ve taleb ve ahz u kabz ve bize îsâl ve teslîme ve kabz ve teslîm[in] mütevakkıf olduğu umûrun cümlesine mezbûr Mehmed Çelebi’yi tarafımızdan vekîl ve nâib-i menâb nasb ve ta‘yîn eyledik dediklerinde ol dahi vekâlet-i merkūmeyi kabûl ve hizmet-i lâzımesin edâya ta‘ahhüd etmeğin mâ hüve’l-vâki‘ bi’t-taleb ketb olundu. Fî-gurreti Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Mehmed b. el-Hâc Receb, İbrahim Bey Un Kapanı kethudâsı, Hasan Bey Un Kapanı kethudâsı, Hasan b. Mustafa el-muhzır, Abdi Çelebi b. Hüseyin el-muhzır, Baba Rasûl b. Rıdvan el-muhzır.