İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 757 Hüküm no: 921 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakizâde Esad Efendi’nin Südlüce’deki mülk menzilini Yusuf Efendi b. Hacı Hüseyin’e sattığı Keşif. Husûs-ı âti’l-beyânının mahâllinde tahrîri iltimâs olunmağın savb-ı şer‘den Mevlânâ Mustafa Efendi irsâl olunup ol dahi mahmiye-i İstanbul’da Muhtesib Karagöz mahallesinde sâkin mahrûse-i Bursa kazâsından münfasıl a‘lemül-ulemâ’i’l-mütebahhirîn efdalü fudalâi’l-müteverri‘în Bakizâde Esad Efendi b. el-mevla’l-merhûm Abdurrahman Efendi’nin menzil-i âlîlerine varıp zeyl-i vesîkada mastûrü’l-esâmî olan Müslimîn huzûrlarında akd-i meclis-i şer‘ eylediğinde mûmâ-ileyh Esad Efendi meclis-i ma‘kūd-ı mezbûrda hâlâ Matbah-ı âmire emîni olan iftihârü’l-emâcid ve’l-ekârim câmi‘ü’l-mehâmid ve’l-mekârim Yusuf Efendi b. el-Hâc Hüseyin tarafından ikrâr-ı câ’i’z-zikri tasdîka vekîl olup nehc-i şer‘î-i mu‘tebere üzere vekâleti sâbite olan li-ebeveyn birâderleri fahrü’l-akrân Hasan Ağa muvâcehesinde ikrâr ve takrîr-i kelâm edip havâss-ı Kostantıniyye muzâfâtından kasaba-i Hasköy’e tâbi‘ Südlüce nâm mevzi‘de vâki‘ silk-i mülk-i sahîhimde münselik bir tarafı merhûm Müfti Abdurrahim Efendi kethudâsı Mustafa Ağa mülküne ve tarafeyn tarîk-i hâs ve taraf-ı râbi‘i tarîk[a] müntehî dâhiliye ve hâriciye dört bâb tahtânî odaları ve iki sofa ve iki kenîfi ve bu müte‘addide su kuyularını ve eşcâr-ı müsmire ve gayr-ı müsmireli hadîkayı müştemil senede Sultan Bâyezid Vakfı’na doksan beş akçe mukāta‘ası olan mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî üç yüz yetmiş esedî guruşa bey‘ ve teslîm eyleyip ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mârrü’z-zikr üç yüz yetmiş beş esedî guruşu hâlâ vekîl-i merkūm Hasan Ağa yedinden tamamen ahz u kabz eyledim min-ba‘d menzil-i mahdûd-ı mezbûr müvekkil-i müşârün-ileyh Yusuf Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde vâki‘ hâli mevlânâ-yı mezbûr mahâllinde tahrîr ve terkīm ba‘dehû ma‘an irsâl olunan Ahmed b. Ali ile meclis-i şer‘a gelip alâ-vukū‘ihî takrîr ve tefhîm etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ali Efendi b. Süleyman, Ahmed Efendi b. el-Hâc Abdi, Mustafa Ağa b. Durmuş, Umdetü’l-kuzât Abdurrahman Efendi b. Şaban, el-Hâc Ali b. Kurd, Mustafa Beşe b. Ali, Mahmud Bey b. Mustafa, Mehmed Ağa b. Ali, Cafer Çavuş b. Mehmed.