İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 760 Hüküm no: 925 Orijinal metin no: [119b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hasan Çavuş’un Hatice bt. Abdullah’ta olan alacağının kocası ve kefili Derviş Mehmed Bey’den tahsil edip zimmetini ibra ettiği İkrâr-ı ahz-ı mâl. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Mustafa Paşa mahallesinde umdetü’l-emâcid ve’l-ekârim Derviş Mehmed Bey b. el-merhûm Süleyman Bey’in sâkin olduğu menziline varıp zeyl-i rakīmde mastûrü’l-esâmî olan Müslimîn huzûrunda akd-i meclis-i şer‘ eyledikde merhûm Kara Çelebizâde Mahmud Efendi’nin tevâbi‘inden olup bundan esbak vefât eden Hasan Çavuş’un oğlu sulbî sagīr Mustafa’nın kıbel-i şer‘den mansûbe vasîsi ve vâlidesi Sâliha bt. Abdullah nâm hatunun zâtı Osman Çelebi b. Piyale ve Derviş b. Abdullah ta‘rîfleriyle mu‘arrefe oldukdan sonra meclis-i ma‘kūd-ı mezbûrda işbu kitâbın sahibi merkūm Derviş Mehmed Bey mahzarında bi’l-vesâye ikrâr ve takrîr-i kelâm edip târih-i kitâbdan dört sene mukaddem mezkûr Derviş Mehmed Bey’in zevcesi gāibe ani’l-meclis Hadîce bt. Abdullah nâm hatun zimmetinde sagīr-i mezkûrun mâlından dört yüz riyâlî guruş ve devr-i şer‘î ile üzerine ilzâm olunan doksan dört buçuk riyâlî guruş ki cem‘an dört yüz doksan dört buçuk guruşa merkūm Derviş Mehmed Bey emr ve kabûlü hâviye kefâlet-i sahîha ile kefîl yedime hat ve hâtemini hâvî temessük vermiş idi el-hâletü hâzihî meblağ-ı merkūm dört yüz doksan dört buçuk guruşu yedişer dirhem olmak üzere mesfûr Derviş Mehmed Bey kefâletine binâen bana def‘ ü teslîm ben dahi vesâyetim hasebiyle yedinden tamamen ahz u kabz eyledim meblağ-ı mezbûr dört yüz doksan dört buçuk riyâlî guruşdan asîl ve kefîl zimmetlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ramazan Çavuş el-mübâşir, el-Hâc Yusuf Çelebi b. Hüseyin, İbrahim Çelebi b. Süleyman, Halil b. Mehmed, Mustafa b. Abdi.