İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 761 Hüküm no: 926 Orijinal metin no: [119b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Etpazarı’nda kefere taifesinin alıp sattığı davarlardan alınan altı akçenin iki akçesini pazar kethudası, dört akçesini de pazar emininin alması gerektiği Mahmiye-i İstanbul’da Etbâzârı kethudâsı işbu râfi‘u’l-vesîka Ahmed Bey b. Musa meclis-i şer‘-i hatîrde bâzâr-ı mezbûr emîni olan Ali Beşe b. İbrahim mahzarında üzerine takrîr-i da‘vâ edip kadîmü’l-eyyâmdan bu ana gelince bâzâr-ı mezbûrda kefere tâifesinin alıp satdığı davarlardan ahz olunan altı akçenin iki akçesini bâzâr-ı mezbûrda kethudâ olanlar alıp ve dört akçesin emîn olanlar alagelmiş iken hâlâ olıgelmişe muhâlif ol altı akçenin cümlesini mezbûr Ali Beşe ben alırın deyü bana gadr eder mezbûrdan suâl olundukdan sonra husûs-ı mezbûra vukūf-ı tâmmı olan kimesnelerden istihbâr olunmak murâdımdır dedikde gıbbe’s-suâl emîn-i mezkûr cevâbında kazıyye-i mezbûr Ahmed Bey[‘in] takrîr eylediği vech üzere olduğunu inkâr edicek bâzâr-ı mezbûrda olan habbâz tâifesinin ihtiyârlarından Solak Mehmed Beşe b. Mustafa ve İbrahim Beşe b. Mehmed ve Osman b. Ömer ve el-Hâc Şaban b. İsmail ve Şahin Beşe b. Hasan ve el-Hâc İsmail b. Hasan ve el-Hâc Hasan b. Hudâverdi ve sâirlerden husûs-ı mezbûr istifsâr olundukda onlar dahi kırk seneden beri kefere tâifesinin alıp satdıkları davarlardan ahz olunan altı akçenin iki akçesin et bâzârı kethudâsı alıp dört akçesin emîn olanlar alagelmişlerdir deyü her biri alâ-tarîkı’ş-şehâde haber verdiklerinde kadîmden olıgeldiği üzere ol altı akçenin iki akçesini kethudâ-yı mezbûr alıp mâ‘adâsı olan dört akçesin emîn-i mezbûr almak üzere rızâları ile işbu hurûf bi’t-taleb ketb olundu. Fî-selhi Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud kethudâ-yı muhzırân, Veli b. Mahmud, İsmail b. Mehmed, Hasan b. Mustafa, Abdi Çelebi b. Hüseyin ve gayruhum.