İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 761 Hüküm no: 927 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Vasil v. Yani ve ortağı Nikola v. Manol’un pirincini Mısır’dan İstanbul’a getiren gemi reisi ve tayfaların ücretlerini aldıklarını ikrar ettikleri İkrâr-ı ahz. Tüccâr tâifesinden işbu bâ‘iseyi’s-sifr Vasil v. Yani ve şeriki Nikola v. Manol nâm zimmîler mahfil-i kazâda kendi tarafından asâleten ve Praşkova Reis tarafından husûs-ı âti’l-beyâna vekîl-i sâbitü’l-vekâlesi olan Masko v. İstefan nâm zimmî ve yine mellâh tâifesinden Yorgi v. Manol ve Yani v. Papas ve Manol v. Nikola ve Yani v. Manol nâm zimmîler muvâcehelerinde takrîr-i kelâm edip bundan akdem diyâr-ı Mısriyye’de Dimyat İskelesi’nden mahmiye-i İstanbul’a îsâl için mezbûrun sefinesine her yüz erdebine dörder yüz tâmmü’l-vezn riyâlî guruş olmak üzere bin yedi yüz yirmi iki riyâlî guruşun ücretiyle dört yüz otuz buçuk erdeb pirinç tahmîl edip onlar dahi tahmîl ve kabûl ve kabz edip mahmiye-i mezbûreye îsâl edip zikri mürûr eden pirinci bi’t-tamam ve’l-kemâl bize teslîm eylediklerinden sonra ücreti olan bin yedi yüz yirmi iki riyâlî guruşu bi’t-tamam kendilere def‘ ü teslîm eyledik hâlâ suâl olunup takrîrleri tahrîr olunmak matlûbumdur dedikde gıbbe’s-suâl mezbûr zimmîler cevâblarında fi’l-hakīka mezbûrânın dört yüz otuz buçuk erdeb pirinci getirip merkūmâna teslîm ve ücreti olan meblağ-ı mezbûr bin yedi yüz yirmi iki tâmmü’l-vezn riyâlî guruşu yedlerinden bi’t-tamam ahz u kabz eyledik dediklerinde mâ-vaka‘a bi’t-taleb ketb olundu. Fî-selhi min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Abdurrahim Eendi b. es-Seyyid Abdullah, Fahrü’l-kuzâtü’l-İslâm Ahmed Efendi, el-Hâc Ahmed b. Mahmud, Osman Efendi el-kādî, es-Seyyid Ramazan Efendi.