İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 762 Hüküm no: 928 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İbrahim Beşe b. Mehmed’in varislerinden kız kardeşi Hatice ile karısı Ayşe bt. Bâyezid’in miras hususunda sulh oldukları İbrâ ve ıskāt. Vilâyet-i Rumeli’nde Cisr-i Ergene kazâsına tâbi‘ Umurca nâm karye sükkânından olup bundan akdem mahmiye-i İstanbul’da Defterdâr mahallesinde sâkin iken fevt olan İbrahim Beşe b. Mehmed’in verâseti zevce-i metrûkesi Âişe bt. Bâyezid nâm hatuna ve sulbiye sagīre kızları Fâtıma ve Emetullah ile li-eb kız karındaşı Hadice’ye ve vâlidesi Râziye bt. Ali nâm hatuna münhasıra olduğu şer‘an mütehakkık oldukdan sonra mezbûre Hadîce meclis-i şer‘-i hatîr-i lâzımü’t-tevkīrde sagīretân-ı mezbûretânın vâlideleri ve kıbel-i şer‘den mansûb vasîleri olan işbu râfi‘atü’l-kitâb mezbûre Âişe Hatun mahzarında ikrâr ve takrîr-i kelâm edip müteveffâ-yı merkūm İbrahim Beşe’nin muhallefâtından ber-mûceb-i defter-i kassâm altmış bin akçeden hisse-i şer‘iyemi tamamen ahz u kabz eylediğimden sonra hâric-i ez-defter beynimizde ma‘lûmü’l-hudûd menzil ile bazı eşyâ dahi ahz u kabz etmiş idik deyü merkūme Âişe’den bundan akdem taleb ve da‘vâ eylediğimde beynimizde münâza‘ât-ı kesîre vâki‘ olmuş idi el-hâletü hâzihî tavassut-ı muslihîn ile mezbûre Âişe da‘vâ-yı mezbûrundan benimle kendi mâlında vermek üzere beş kıt‘a riyâlî guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr beş guruşu mezbûre Âişe yedinden ahz u kabz edip müteveffâ-yı mezbûrun muhallefâtına müte‘allika cemî‘ de‘âvî ve mütâlebeden mezbûre Âişe’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Cafer Çavuş b. ( ) el-mübâşir, Mustafa Beşe b. Mahmud, Abdi Çelebi b. Hüseyin, Osman Beşe bölükbaşı, Veli b. Mahmud.