İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 763 Hüküm no: 929 Orijinal metin no: [120a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed b. Hüseyin’in varislerinden olan Halil Beşe b. Ali’nin miras davasının reddi Mahmiye-i İstanbul’da Kenîse Câmi‘ mahallesinde sâkin iken bundan akdem vefât eden Mehmed b. Hüseyin nâm sagīrin verâseti vâlidesi İsmihan bt. Hasan nâm hatun ile mezbûr Mehmed’in ibn-i ammi Halil Beşe b. Ali’ye münhasıra olduğu şer‘an müte‘ayyin ve asl-ı mes’eleleri üç sehimden olup sihâm-ı merkūmenin bir sehmi merkūme İsmihan’a ve iki sehmi mezbûr Halil Beşe’ye isâbet eylediği mütebeyyin oldukdan sonra mezbûr Halil Beşe meclis-i şer‘de müteveffâ-yı mezbûrun muhallefâtına vâzı‘atü’l-yed olan mezbûre İsmihan Hatun tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan Ömer Beşe b. Mehmed ve Yakub b. Pîrî şehâdetleriyle şer‘an vekâleti sâbite olan li-ebeveyn karındaşı Ali’nin mahzarında üzerine da‘vâ ve takrîr-i kelâm edip müteveffâ-yı mezbûrun muhallefâtının üç sehimden bir sehmi mezbûre İsmihan’a ve iki sehmi bana isâbet etmiş iken müvekkile-i mezbûre tereke-i müteveffâ-yı mezbûrdan iki sehm hissemi vermede ta‘allül eder suâl olunsun dedikde gıbbe’s-suâl vekîl-i mezbûr cevâbında merkūm Halil Beşe târih-i kitâb senesi Saferü’l-hayr’ın on beşinci gününde [120b] mahmiye-i mezbûrede Bâb Mahkemesi’nde nâibü’ş-şer‘ olan efdalü’l-müderrisîni’l-kirâm Mehmed Efendi b. Ahmed huzûrunda müteveffâ-yı mezbûrun kalîl ve kesîr, celîl ve hakīr terekesinden kendiye â’id olan iki sehm hissesi mukābelesinde şerâyit-i sıhhat-i sulhu hâvî ve mevâni‘-i müfsideden ârî ve hâric şer‘î vech üzere mezbûre İsmihan’la on beş bin akçe üzere sulh olup bedel-i sulh olan meblağ-ı mezbûru merkūme İsmihan yedinden bi’t-tamam ahz u kabz edip husûs-ı mezbûra müte‘allika da‘vâdan müvekkilemin zimmetini ibrâ ve ıskāt eylediğini ben mezbûre İsmihan’ın tarafından tasdîka vekîli olmağla muvâcehemde ikrâr ve ba‘de’t-tasdîk mevlânâ-yı mezbûr ikrârını ba‘de’t-tahrîr yedime işbu hüccet-i şer‘iyeyi vermişdir deyü târih-i mezbûr ile müverreha ve mevlânâ-yı mezbûrun imzâsıyla mümzât hüccet-i şer‘iye ibrâz edip ba‘de’n-nazar mezbûr Halil Beşe muvâcehesinde feth ve kırâet ve istintâk olundukda mezbûr Halil Beşe mazmûn-ı hüccet-i mezkûreyi inkâr edicek vekîl-i mezbûrdan müdde‘âsını mübeyyine beyyine taleb olundukda mahmiye-i mezbûrede Nuri Dede mahallesinde Ahmed Çelebi b. Cafer ve Mehmed Beşe b. İlyas ve Sofular mahallesinde Yusuf b. Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ merkūm Halil Beşe müteveffâ-yı mezbûrun kalîl ve kebîr, celîl ve hakīr terekesinden kendiye â’id olan iki sehm hissesi mukābelesinde bi-tarîkı’t-tehârüc on beş bin akçe üzerine sulh olup bedel-i sulh olan meblağı-ı mezbûru bi’t-tamam kabz edip husûs-ı mezbûra müte‘allika da‘vâdan mezbûre İsmihan’ın zimmetini ibrâ ve ıskāt eylediğini merkūme İsmihan tarafından tasdîka vekîli olan mezbûr Ali Çelebi muvâcehesinde ikrâr ve ba‘de’t-tasdîk mevlânâ-yı mezbûr ba‘de’t-tahrîr işbu hüccet-i şer‘iyeyi vekîl-i mezbûra vermişdir biz mazmûn-ı hüccete şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Halil Beşe mu‘ârazadan men‘ olundu. Mâ vaka‘a bi’t-taleb ketb olundu. Fî-yevmi’s-sâmin ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Beşe b. ( ), Hamza Beşe b. ( ), Abdi B Hüseyin, Mehmed b. Ramazan, Rasûl b. Rıdvan.