İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 764 Hüküm no: 930 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malmatine bt. Dimitraci’nin İznik’deki mülk menzil hissesini Kostantin v. İstemeva’ya sattığı Hüccet-i bey‘. Kasaba-i İznikmid mahallâtından Kefere mahallesinde sâkin iken bundan akdem hâlik olan Dimitraci v. Andriya nâm zimmînin verâseti sulbiye kebîre kızları Lisaro ve Malmatine ve Afendo ve Palasi nâm Nasrâniyelere münhasıra ve asl-ı mes’eleleri dört sehimden olup sihâm-ı mezbûreden mezbûrâtın her birine birer sehm isâbet ve intikāl eylediği şer‘an zâhir ve müte‘ayyin oldukdan sonra merkūme Malmatine’nin zevci ve tarafından husûs-ı âti’l-beyânı ikrâra vekîl olup medîne-i Galata mahallâtından Sultan Bâyezid mahallesinde sâkin Yori v. Kiryako ve Sostos v. Mihal nâm zimmîler şehâdetleriyle şer‘an vekâleti sâbite olan Yani v. Ambera nâm zimmî mahfil-i kazâda işbu bâ‘isü’s-sifr Kostantin v. İstemeva nâm zimmî muvâcehesinde bi’l-vekâle ikrâr ve takrîr-i kelâm edip hâlik-i merkūm Dimitrako’nun (Dimitraci’nin) terekesinden olup kasaba-i mezbûrede mahalle-i merkūmede vâki‘ bir tarafı Balıkcı nâm zimmî mülkü ve bir tarafı Neccâr Kostantin mülkü ve bir tarafı Haritava veresesi mülkü ve bir tarafı tarîk-i âmla mahdûd olup fevkānî bir bâb oda ve tahtında bir bâb bakkāl dükkânı ve kenîfi müştemil mülk menzilden olan bir sehm hisse-i şâyi‘asını müvekkilem mezbûra bi’l-emânet mezbûr Kostantin’e on bir bin beş yüz nakd-i râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi iştirâ ve kabûl [121a] eyledikden sonra semeni olan meblağ-ı mezbûr on bir bin beş yüz akçeyi müvekkilem mezbûre Malmatine müşteri-i merkūm Kostantin yedinden tamamen ahz u kabz edip ba‘de’l-yevm müvekkilem mezbûre Malmatine menzil-i mezbûrda olan bir sehm hisse-i şâyi‘asını kabz ve tasarrufa mahâllinde taslît eyledim dedi dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Cafer Reis b. Ali, Ahmed Yazıcı b. Receb, İbrahim b. Ebûbekir, Mehmed b. ( ), İbrahim b. Hüseyin, Yusuf Yazıcı b. Mehmed, Müezzinoğlu Mustafa b. Mehmed.