İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 765 Hüküm no: 931 Orijinal metin no: [121a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin eşyalarını çalmakla itham ettiği Musa b. Hasan’a annesi Ayşe bt. Mehmed’in kefil olduğu Kefâlet. Medîne-i Hazret-i Ebî Eyyûb-i Ensârî mahallâtından Mehmed Bey mahallesinde Mustafa b. Ali dîvân-ı sadrazamîde ma‘kūd mahfil-i kazâda mahalle-i mezbûre sükkânından Musa b. Hasan mahzarında üzerine takrîr-i da‘vâ edip târih-i kitâbdan kırk beş gün mukaddem menzilim açılıp eşyâ-i memlûkemden bir sîm raht kuşak ve bir sîm ön kuşak ve bir köhne sagīre şal kerrakesi ve bir sîm hançer ve bir örfiye ve bir sof ferâce ve mâ’î atlas kaftan ve bir Şam alacası kaftan ve bir anberî entâri ve bir boğçam hufyeten ahz olunup mezbûr Musa’yı mazanne ittihâz etmişimdir suâl olunsun dedikde gıbbe’s-suâl mezbûr Musa husûs-ı mezbûru bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘î-i mezbûrun menzilinden eşyâ-yı mezkûreyi hufyeten ahz u kabz etmeyip elân üzerine reddi lâzım olmadığına mezbûr Musa’ya yemîn teklîf olundukda ol dahi alâ-vefki’l-mesûl yemîn billâhi te‘âlâ etdikden sonra mezbûr Musa’nın keyfiyet-i ahvâli mahallesi ahâlîsinden işbu hâzırûn bi’l-meclis Mehmed Efendi b. Hasan el-imâm ve Ali b. Mehmed ve Mustafa b. Mehmed ve Abdurrahman b. Yusuf, Muharrem b. Ali nâm kimesnelerden suâl olundukda mezbûr Musa dört seneden beri mahalle-i mezbûremizde sâkin ve dindâr ve müstakīm olup her birimiz ef‘âl ve akvâlinden râzılarız deyü mezbûrun hüsn-i hâlini haber verdiklerinden sonra mezbûrun ahzına ve hîn-i mütâlebede meclis-i şer‘a ihzâra vâlidesi hâzıra bi’l-meclis Âişe bt. Mehmed kefîl olmağın mâ-vaka‘a bi’t-taleb ketb olundu. Fi’l-yevmi’s-sânî Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ali Beşe el-mübâşir, Mehmed Ağa ser-muhzırân, Mehmed Ağa b. ( ), Abdi b. Hüseyin ve gayru[hüm].