İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 766 Hüküm no: 934 Orijinal metin no: [121b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Felç olup akıl sağlığı yerinde olmayan Tacir Mustafa b. Mahmud üzerine oğlu Mahmud Çelebi’nin vasî tayin olunduğu Vesâyet. Mahmiye-i İstanbul’da Sarrâchâne kurbünde Dülgerzâde mahallesinde sâkin Mustafa b. Mahmud nâm tâcir on beş seneden beri meflûc olduğundan mâ‘adâ iki seneden beri aklına hiffet gelmekle kendi mâlını tasarrufa kādir olmamağın mezbûrun üzerine şer‘an bir vasî nasbı lâzım ve lâ-büd idiğin mahalle-i mezbûre ahâlîsinden el-Hâc İbrahim b. el-Hâc Ahmed ve Osman Çelebi b. Hüseyin ve Mehmed Çelebi b. Osman ve Ömer Beşe b. Mehmed ve Ahmed b. Abdullah ve Mehmed b. Ahmed ve Ömer Çelebi b. Osman ve Ramazan b. Veli nâm sikāt-ı sahîhü’l-kelîmât ihbârları ile mezbûr Mustafa’nın aklına hiffet târî ve ârız olduğun lede’ş-şer‘ sâbit ve zâhir oldukdan sonra hâkim-i muvakkı‘-ı [sadr-ı] kitâb tûbâ-lehû ve hüsnü-meâb hazretleri dahi mezbûr Mustafa’nın ahvâlini hıfz ve emvâlini zabt için vesâyete her vechile ehil olan sulbî kebîr oğlu işbu râfi‘u’l-kitâb Mahmud Çelebi b. ( ) babası mezbûr Mustafa’nın üzerine kıbel-i şer‘den vasî nasb ve ta‘yîn eyledikde vesâyet-i mezbûreyi kabûl ve hidemâtın edâya müte‘ahhid olmağın mâ hüve’l-vâki‘ bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud, Ahmed b. Abdülcabbar, Osman Çelebi b. Abdullah, Mustafa b. Mustafa, el-Hâc Yusuf b. Musa.