İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 767 Hüküm no: 935 Orijinal metin no: [121b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Marat v. Agob’un Divriği’ye bağlı Kesme köyündeki tarlasının kullanım hakkını Marat v. Manuk’a devrettiği Hüccet-i ferâğ. Vilâyet-i Anadolu’da Divriği kazâsına tâbi‘ Kesme nâm karyeden Marat v. Agob nâm Ermeni meclis-i şer‘-i hatîrde bâ‘isü’s-sifr Marat v. Manuk nâm Ermeni muvâcehesinde ikrâr ve takrîr-i kelâm edip karye-i mezbûrede vâki‘ bir tarafı Abraham nâm Ermeni tarlasına ve bir tarafı Makdesi v. Haçok tarlasına ve bir tarafı Avanos v. İshak nâm Ermeni tarlasına ve bir tarafı nehr-i cârîye müntehî tahmînen iki dönüm tarlayı ma‘rifet-i sahib-i arz ile yirmi iki riyâlî guruşa mezbûr Marat v. Manuk’a ferâğ ve tefvîz ol dahi tefevvüz ve kabûl eyledikden sonra bedel-i ferâğ olan yirmi iki guruşu mezbûr Marat yedinden ahz u kabz edip zikrolunan tarlayı mahâllinde kabz ve tasarrufa mezbûru taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Murad Beşe b. Abdullah, Abdi Çelebi b. Hüseyin, Gazanfer b. Tevekkül, Rasûl b. Rıdvan.