İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 768 Hüküm no: 936 Orijinal metin no: [121b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlı Bey b. Hacı Hasan’ın Karabaş mahallesindeki menzilini Hasan Efendi b. Dede’ye sattığı Mahmiye-i İstanbul’da Yenibağçe kurbünde Karabaş mahallesinde sâkin Fazlı Bey b. el-Hâc Hasan meclis-i şer‘-i hatîrde işbu râfi‘u’l-kitâb Hasan Efendi b. Dede mahzarında takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ bir tarafdan ba‘zan Hadîce Hatun’a ve ba‘zan Hacı tasarruflarında olan Medîne-i Münevvere Vakfı’na ve iki tarafdan tarîk-i hâssa ve bir tarafdan tarîk-i âmma müntehî olup beş bâb fevkānî oda ve bir sofa ve bir kenîfi ve altlarında bir oda ve bir ahır ve bir kenîfi ve bir su kuyusunu ve cüneyneyi müştemil cemî‘ menzilimi kâffe-i hukūk ve merâfıkı ve âmme-i menâfi‘ ve levâhıkı mezbûr Hasan Efendi’ye seksen beş bin akçeye bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semen-i mezkûrdan elli bin akçesini zimmetimde mezbûr Hasan Efendi’ye deynim olan elli bin akçeye takās ol dahi mukāssa ve kabûl eyledikden sonra bâkīsi olan otuz beş bin akçesini dahi yedinden alıp kabz eyledim ba‘de’l-yevm menzil-i mahdûd-ı mezbûr mersûm Hasan Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Himmet Efendi, İsa Efendi b. Mehmed Efendi, Mehmed Bey b. Yusuf el-cündî, Ali Bey b. Yusuf el-cündî, Hasan Efendi b. Mustafa el-imâm, Mehmed Efendi b. Mustafa, Ali Çelebi b. Ömer, Ali Bey b. Abdullah, Abdullah b. Ramazan.