İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 768 Hüküm no: 937 Orijinal metin no: [121b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa tarafından vakfedilen menzile Muslı Bey b. Ali’nin müdahalesinin meni Mahmiye-i İstanbul’da Mollagürânî mahallesinde sâkin ve zikri âtî vakfın menzilinin meşrûtun-lehi olup vech-i câ’î üzere da‘vâya kıbel-i şer‘den me’zûn olan işbu bâ‘isü’r-rakīm Ali Çelebi b. el-Hâc Mehmed Ağa meclis-i şer‘de zikri câ’î menzile vâzı‘u’l-yed olan Muslı Bey b. Ali mahzarında üzerine da‘vâ edip mahalle-i mezbûrede vâki‘ bir tarafı babam mezbûrun vakfına ve bir tarafı [122a] Hüsameddin Vakfı’na ve bir tarafı ( ) Hatun bt. Mehmed Çavuş mülküne ve bir tarafı tarîk-i âmma müntehî dâhiliyesi beyt-i süflî ve su kuyusu ve zât-ı eşcâr-ı müsmire ve gayr-ı müsmire bahçeyi hâriciyesi iki beyt-i süflî ve tahtında ahırı müştemil menzil, babam olup bundan akdem fevt olan merhûm Mehmed Ağa’nın mülkü olup mülkünde olduğu hâlde bin kırk üç senesi Ramazanı’nın evâhirinde Davud Paşa Mahkemesi’nde nâib olan Mehmed Efendi b. Şeyh Mehmed huzûrunda hâl-i hayatında menzil-i mezbûru vakıf ve süknâsını evvelâ kendi nefsine ba‘de vefâtihî evlâdına ve evlâd-ı evlâdına ve evlâd-ı evlâd-ı evlâdına neslen ba‘de neslin ba‘de’l-inkırâz menzil-i mezbûr mütevellî ile îcâr olunup hâsıl olan [ücreti] Kastamonu Sancağı’nda Araç kazâsına tâbi‘ Hurucviran nâm karyede vâki‘ [binâ] eylediğim mektebin mu‘allimine irsâl oluna deyü şart ve ta‘yîn ve teslîm ile’l-mütevellî ve tescîl-i şer‘î etdirip ba‘de’l-münâza‘a sıhhat lüzûmuna hâkim-i mûmâ-ileyh hükm ve yedine işbu vakfiye-i ma‘mûlün-bihâ ve mu‘addelün-aleyhâyı verip hâlâ ben vâkıf-ı mezbûrun sulbî oğlu olup süknâ-yı menzil-i mezbûr benim ile karındaşım gāib ani’l-meclis Hüseyin’e intikāl etmiş iken mezbûr Muslı Bey nâ-hak vaz‘-ı yed eder suâl olunup kasr-ı yedine tenbîh olunması murâdımdır deyü târih-i mezbûr ile müverraha ve mevlânâ-yı mezbûrun imzâsıyla mümzât ve hatmi ile mahtûme vakfiye ibrâz edip mezbûr Muslı Bey muvâcehesinde feth ve kırâet ve istintâk olundukda mezbûr Muslı Bey menzil-i mezbûra vaz‘-ı yedini ikrâr lâkin vech-i muharrer üzere vakfiyeti ma‘lûmum değildir deyü inkâr edicek müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından İbrahim b. Mahmud ve Mehmed b. Ali ve mahmiye-i mezbûrede Mi‘mâr Sinan mahallesinde sâkin el-Hâc Mustafa b. Ali el-hamâmî nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Hacı Mehmed Ağa hâl-i sıhhatinde bin kırk üç senesi Ramazan’ının evâhirinde Davud Paşa Mahkemesi’nde nâibü’ş-şer‘ olan Mehmed Efendi b. eş-Şeyh Mehmed huzûrunda zikrolunan Mollagürânî mahallesinde vâki‘ bir tarafı kendi vakfına ve bir tarafı Hüsameddin Vakfı’na ve bir tarafı ( ) Hatun bt. Mehmed Çavuş mülküne ve bir tarafı tarîka müntehî dâhiliyesi beyt-i süflî ve zât-ı eşcâr-ı müsmire ve gayr-ı müsmire bahçe va hâriciyesi iki beyt-i ulvî ve tahtında ahırı müştemil menzilini mülkünde olduğu hâlde vakf ve süknâsı evvelen kendi nefsine ba‘de vefâtihî evlâd ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz menzil yed-i mütevellî ile îcâr olunup hâsıl olan ücreti zikrolunan Hurucviran nâm karyede binâ eylediği mektebin mu‘allimine irsâl oluna deyü şart ve ta‘yîn ve teslîm ile’l-mütevellî ve tescîl-i şer‘î edip ba‘de’l-münâza‘a mûmâ-ileyh Mehmed Efendi sıhhat lüzûmuna huzûrumuzda hükm ve yedine işbu vakfiye-i ma‘mûlün-bihâ ve mu‘addelün-aleyhâyı vermişdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr Muslı Bey’in kasr-ı yedine tenbîh olunup mâ-vaka‘a bi’t-taleb ketb olundu. Fî-gurreti Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Çelebi b. Receb, Şükrullah b. Mustafa, Abdi b. Hüseyin, Mehmed b. Şaban ve gayruhum.