İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 770 Hüküm no: 938 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Badıyelda bt. Abdullah’ın tasarrufunda olan vakıf menzil arsasının kızı arafından Abdurrahman b. Veli’ye devredildiği Mahmiye-i İstanbul’da Kırkçeşme kurbünde Firuzağa mahallesinde sâkine iken bundan akdem vefât eden Badıyelda bt. Abdullah’ın sadriye sagīre kızı Kaya’nın babası ve velisi Hamza b. Fethullah nâm kimesne meclis-i şer‘-i hatîrde işbu râfi‘u’l-vesîka Abdurrahman b. Veli mahzarında ikrâr ve i‘tirâf edip merhûm Firuzağa mescid-i şerîfi evkāfı akārâtından olup mahalle-i mezbûrede vâki‘ bir tarafdan Hasan Çelebi tasarrufunda olan vakıf arsaya ve bir tarafdan Âişe Hatun tasarrufunda olan vakıf arsaya ve bir tarafdan Sarrâc Ali tasarrufunda olan vakıf arsaya ve bir tarafdan tarîk-i âmma müntehî menzil icâre-i mu‘accele ve mü’eccele-i ma‘lûme ile müteveffât-ı merkūme Badıyelda Hatun’un ile’l-vefât taht-ı tasarrufunda olup ba‘de vefâtihî intikāl-i âdî ile kızı sagīre-i mezbûre Kaya’ya intikāl eyledikden sonra bin yetmiş senesi Zilka‘desi’nin on altıncı gününde vâki‘ olan harîk-i kebîrde menzil-i mezbûr muhterik olup arsa-i sırfa kaldıkda icâre-i mu‘accelesine mahsûb olmak üzere müceddeden binâya ve arsası için cânib-i vakfa icâreye sagīre-i mezbûrenin mâlı olmayıp ve nafakaya dahi eşedd-i ihtiyâcla muhtâce olmağla bedel-i misliyle arsa-i mezkûre âhara tefvîz olunup bedeli istirbâh olunmak sagīre-i mezbûreye enfa‘ olmağın velâyetim hasebiyle arsa-i mezkûreyi izn-i mütevellî ile bedel-i misli olan beş bin yedi yüz akçe mukābelesinde mezbûr Abdurrahman Çelebi’ye ferâğ ve tefvîz ve teslîm edip ol dahi vech-i muharrer üzere tefevvüz [ve] kabûl ve tesellüm eyledikden sonra bedel-i ferâğ olan [122b] meblağ-ı mezbûr beş bin yedi yüz akçeyi sagīre-i mezkûre için velâyet-i mezbûr[u hasebiyle] Abdurrahman Çelebi yedinden tamamen ahz u kabz eyledim ba‘de’l-yevm arsa-i menzil-i mezkûr merkūm Abdurrahman Çelebi’nin hakk-ı tefevvüzüdür keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Mehmed Efendi b. İnayetullah, Mehmed b. Receb, Mehmed b. Ali, Dilaver b. Abdullah, Halil Efendi el-imâm, Ahmed Efendi el-müderris, Yusuf Beşe b. Abdullah, Osman çorbacı b. Mehmed.