İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 770 Hüküm no: 939 Orijinal metin no: [122b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Süleyman’ın Hacı Hasan mahallesindeki bina hissesini borcuna karşılık olarak kardeşi Abdullah Çelebi’ye devrettiği Mahmiye-i İstanbul’da Hacı Hasan mahallesinde sâkine Âişe Hatun bt. el-Hâc Süleyman tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân olan Hasan Çelebi b. Mahmud ve Mustafa b. Mehmed şehâdetleriyle şer‘an vekâleti sâbite olan el-Hâc Hüseyin b. Hamza meclis-i şer‘-i hatîrde işbu râfi‘u’l-kitâb müvekkile-i mezbûrenin li-ebeveyn karındaşı Abdullah Çelebi b. el-Hâc Süleyman mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Abdurrahman mülküne ve bir tarafdan Hammâmî Ahmed Çelebi mülküne ve bir tarafdan Musa Beşe tarafında olan mülküne ve bir tarafdan tarîk-i âmma müntehî menzil arsanın üzerinde mevcûd biribiri üzerinde iki bâb fevkānî oda ve altlarında bir matbah müvekkile-i mezbûrenin babası el-Hâc Süleyman’ın mülkü olmağın ba‘de vefâtihî zikirleri sebk eden iki bâb oda ile bir bâb matbah üç sehm i‘tibâr olunur sihâm-ı mezbûreden iki sehmi oğlu mezbûr Abdullah Çelebi’ye ve bir sehmi kızı müvekkile-i mezbûreye intikāl eylemişdi el-hâletü hâzihî ebniye-i mezkûrede olan bir sehm hissesini müvekkilem mezbûre Âişe Hatun mezbûr Abdullah Çelebi’ye on beş bin akçeye bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr on beş bin akçeyi mezbûr Abdullah Çelebi’den bundan akdem tefevvüz ve kabûl eylediği yeni bedestânda Sırıkcılar Kapısı tarafında vâki‘ vakıf dolabda olan hissesinin bedeli olup müvekkilenin zimmetinde mezbûr Abdullah Çelebi’ye deyni olan on beş bin akçeye takās ol dahi mukāssa ve kabûl eylemeğin ebniye-i mezkûrede müvekkilemin alâkası kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi b. Mahmud el-imâm, Bekir Halîfe b. Hasan el-müezzin, Musa b. Seydi, Receb Beşe b. Hasan, birâder-eş Halil, Berber Yusuf Çelebi.