İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 772 Hüküm no: 941 Orijinal metin no: [122b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezban bt. Şaban’ın muhâlaa yoluyla kocası Süleyman Beşe b. İbrahim’den boşandığı Mahmiye-i İstanbul’da Ali Paşa-yı Atîk mahallesi sâkinelerinden Kezban bt. Şaban nâm hatun meclis-i şer‘-i hatîr-i lâzımü’t-tevkīrde zevci işbu râfi‘u’l-kitâb Süleyman Beşe b. İbrahim ikrâr ve takrîr-i kelâm edip zevcim mezbûr Süleyman Beşe zimmetinde mütekarrir ve ma‘kūdün-aleyh olan dört bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm kendi üzerime olmak üzere zevcim mezbûr ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl etdikden sonra zevciyete müte‘allika âmme-i de‘âvî ve mütâlebât ve eymân [ve] muhâsamâtdan zevcim mezbûr Süleyman Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi b. Ahmed, Ahmed Beşe b. Ali, Veli b. Mehmed, Derviş, Mustafa b. Kasım.