İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 772 Hüküm no: 942 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Abdullah’ın miras hususunda Şaban Bey b. Mustafa aleyhine açtığı davanın reddi Mahmiye-i İstanbul’da Balkapısı hâricinde Karabaş mahallesinde sâkine iken bundan akdem fevt olan Şems Ruhsar bt. Abdullah nâm hatunun verâseti zevc-i metrûkü Şaban Bey b. Mustafa ile li-ebeveyn kız karındaşı Âmine Hatun’a münhasıra olduğu şer‘an zâhir ve müte‘ayyin oldukdan sonra mezbûre Âmine tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan zevci Mehmed Bey b. el-Hâc Bayram ve Ali Çavuş b. Mustafa şehâdetleri ile şer‘an vekâleti sâbite olan Zülfikar Çelebi b. Ali meclis-i şer‘de tereke-i müteveffât-ı mezbûra vâzı‘u’l-yed olan merkūm Şaban Bey mahzarında üzerine takrîr-i da‘vâ edip müteveffât-ı mezbûrenin muhallefâtı mukaddemâ beynlerinde iktisâm ve her biri hissesini kabz edip lâkin otuz yedi miskāl altından îcâd ve otuz miskālden masnû‘ bir hançer ve bir dikme yorgan ve bir sîm şam‘dân ve bir mikrâs ve iki sîm kahve tepsisini mezbûr Şaban Bey ketm ve ihfâ etmişdir suâl olunup eşyâ-i mezbûreden müvekkile müdde‘â-bih olan nısf hissesini vermede ta‘allül eder suâl olunsun dedikde gıbbe’s-suâl mezbûr Şaban Bey cevâbında mezbûre Âmine Hatun tarafından zikri âtî husûsu ikrâra mezbûr Zülfikar Çelebi’yi târih-i kitâb senesi Cumâdelâhire’sinin üçüncü gününde vekîl ol dahi ba‘de kabûlü’l-vekâle mahrûse-i Galata muzâfâtından kasaba-i Tophâne’de nâibü’ş-şer‘ olan Mehmed Salahi Efendi huzûrunda müvekkilem mezbûre müteveffât-ı mezbûrenin muhallefâtını beynlerinde iktisâm edip müteveffât-ı mezbûrenin benim zimmetimde mütekarrir olan üç yüz riyâlî guruş mehr-i mü’eccelinden ba‘de küllî hesâb bâkī kalan yüz guruşdan ve evsâfı beynimizde ma‘lûm Dilaver bt. Abdullah nâm câriyenin kıymeti olan yüz on guruşdan ve Vilâyet-i Rumeli’nde Silistre Sancağı’nda vâki‘ Hasan Bey Kışlası demekle ma‘rûf ma‘lûmü’l-hudûd mülk kışlakdan ve mahrûse-i Galata’da vâki‘ lede’l-ahâlî ve’l-cîrân ma‘lûmü’l-hudûd olup kıymeti on dört bin akçe hakkım olan mülk arsa-i hâliyeden ve sâir nükūd ve halı ve esâs-ı beyt ve bi’l-cümle ism-i mâl ıtlâk olunur tereke-i müteveffât-ı mezbûreden nısf hissesi mukābelesinde şerâyit-i sıhhat-ı sulhu hâvî ve mevâni‘-i müfsideden ârî tehârüc-i şer‘î vech üzere on bin akçe ile Galata dâhil inde olan arsa-i hâliyenin nısf hisse-i şâyi‘ası üzerine benim ile sulh olup bedel-i sulh olan meblağ-ı mezbûr ile arsa-i mezbûrenin nısf-ı şâyi‘ini yedinden kabz edip müteveffât-ı mezbûrenin kalîl ve kesîr ve celîl ve hakīr terekesine müte‘allika âmme-i da‘vâdan müvekkilem mezbûre mezbûr Şaban Bey’in zimmetini ibrâ ve ıskāt eyledi deyü mezbûr Zülfikar Bey bi’l-vekâle ikrâr ve ba‘de’t-tasdîk mevlânâ-yı mezbûr işbu hüccet-i şer‘iye tahrîr ve yedime vermişdir bu vech ile vekîl-i mezbûr benden bir nesne talebe [nâ-] kādirdir deyü târih-i mezbûr ile müverraha ve mevlânâ-yı mezbûrun imzâsıyla mümzât ve hatmi ile mahtûme hüccet-i şer‘iye ibrâz edip vekîl-i mezbûr muvâcehesinde feth ve kırâet ve istintâk olundukda vekîl-i mezbûr mazmûn-ı hücet-i mezbûreyi bi-tav‘ihimu‘terif olmağın mûcebince mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çelebi b. Hüseyin, Şükrullah b. Mustafa, Abdi b. Hüseyin, Hasan b. Bayram, Mehmed b. Ramazan, Mehmed Efendi b. Hasan, Mehmed Efendi b. Hüseyin, Derviş Mehmed b. Ahmed, Yusuf Bey b. Abdullah el-cündî, Osman b. İsa, Mehmed b. Ahmed, Mustafa Ağa b. Mehmed, İsa Beşe b. Yusuf, Davud Ağa b. Kurd, Receb Çelebi b. Hızır el-müezzin.