İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 774 Hüküm no: 943 Orijinal metin no: [123a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Şems Ruhsar bt. Abdullah’ın hayatta iken vakfettiği beş yüz guruşun terekesinden alınarak mütevellisi ve kocası Şaban Bey b. Mustafa’ya teslimi Mahmiye-i İstanbul’da Balkapısı hâricinde Karabaş mahallesinde sâkine iken bundan akdem fevt olan Şems Ruhsar bt. Abdullah nâm hatunun verâseti zevc-i metrûkü Şaban Bey b. Mustafa nâm kimesneye ve li-ebeveyn kız karındaşı Âmine Hatun’a münhasıra olduğu şer‘an [zâhir] ve müte‘ayyin oldukdan sonra zikri âtî meblağın mütevellîsi olan mezbûr Şaban Bey meclis-i şer‘de tereke-i müteveffât-ı mezbûreye vâzı‘u’l-yed olan mezbûre Âmine tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan İsmail Dede b. Ali ve Kadri Çelebi b. İsmail şehâdetleriyle şer‘an vekâleti sâbite olan Zülfikar Çelebi b. Ali mahzarında üzerine bi’t-tevliye takrîr-i da‘vâ edip müteveffât-ı mezbûre hâl-i sıhhatinde vakıf ve tescîl-i şer‘î ve teslîm ile’l-mütevellî eylediği beş yüz riyâlî guruşun üç yüz altmış riyâlî guruşunu müteveffât-ı mezbûrenin [123b] terekesinden bi’t-tevliye ahz u kabz edip bâkī yüz kırk guruş ahz etmemekle nısfı olan yetmiş kıt‘a guruşu benim makbûzum olan terekeden ve nısf-ı âharı olan yetmiş guruşu mezbûre Âmine’nin makbûzu olan terekeden lâzım gelmekle hâlâ meblağ-ı mezbûr yetmiş guruşu bi’t-tevliye taleb ederim vekîl-i mezbûrdan suâl olunsun dedikde gıbbe’s-suâl vekîl-i mezbûr cevâbında vech-i muharrer üzere vakıf olan meblağ-ı mezbûr beş yüz guruşun mecmû‘unu mezbûr Şaban Bey tereke-i müteveffât-ı mezbûreden ahz u istifâ etmişdir deyü def‘le mukābele edecek gıbbe’l-istintâk ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ makbûzu olan dört yüz otuz guruşdan mâ‘adâ yetmiş guruşu dahi terekeden vakıf için kabz etmediğine mütevellî-i mezbûra yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çelebi b. Hüseyin, Şükrullah Çelebi b. Mustafa, Abdi Çelebi b. Hüseyin, Hasan b. Bayram, Mehmed b. Ramazan, Karabaş mahallesi imâmı, Kadri Çelebi, Rasûl b. Rıdvan, Derviş Çelebi b. Ahmed, Mehmed b. Ahmed ve gayruhum.