İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 775 Hüküm no: 945 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. İbrahim’in kereste bedeli olarak Salamon v. Karayim ve Avrahim v. Musıl’da 9.500 akçe alacağı olduğu Keresteci tâifesinden Ömer Çelebi b. İbrahim mahfil-i kazâda Yahûdî tâifesinden Salamon v. Karayim ve Avrahim v. Musıl nâm Yahûdiler muvâcehesinde üzerlerine da‘vâ ve takrîr-i kelâm edip mezbûrân Salamon ve Avrahim zimmetlerinde yedimden müşterâ ve makbûz kereste bahâsından on bin yedi yüz akçe hakkım olup meblağ-ı mezbûru defaten edâya iktidârları olmayıp taksît murâd etdiklerinde ben dahi târih-i kitâbdan altı ay mukaddem her ayda beşer yüz akçe vermek üzere yirmi bir ay tamamına değin taksît edip onlar dahi taksît-i mezbûru kabûl ve deyn-i mezbûru edâya ta‘ahhüd etdiklerinden sonra meblağ-ı meskût-ı mezbûrdan bin iki yüz akçe peşîn mezbûrândan ahz u kabz edip bâkī zimmetlerinde dokuz bin beş yüz akçe hakkım kalmış idi hâlâ mal-ı mukāssat-ı mezbûru taleb eylediğimde vermede ta‘allül ederler suâl olunup alıverilmesi matlûbumdur dedikde gıbbe’s-suâl ve akībe’l-inkâr udûl-i Müslimînden olup mahmiye-i İstanbul’da Salih Paşa mahallesinde sâkin Abdurrahman Çelebi b. Receb ve yine mahmiye-i mezbûrede Mehmed Paşa mahallesinde sâkin Mahmud b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīkat müdde‘î-i mezbûrun mezbûrân Salamon ve Avrahim zimmetlerinde yedinden müşterâ ve makbûz kereste bahâsından on bin yedi yüz akçe hakkı olup meblağ-ı mezbûru merkūma edâya iktidârları olmamağla huzûrumuzda târih-i kitâbdan altı ay mukaddem her ayda beş yüz akçe vermek üzere yirmi bir ay tamamına değin taksît edip onlar dahi taksît-i mezbûru kabûl ve deyn-i mezbûru edâya ta‘ahhüd etdiler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Baba Rasûl b. Rıdvan, Mustafa b. Ahmed, Baba Mehmed b. Ramazan, Veli b. Mahmud.