İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 776 Hüküm no: 946 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yahudi Menahim’in Hüsrev Kethuda Vakfı’na olan 4.440 akçe borcunun oğullarından tahsiline hükmolunduğu Mahmiye-i İstanbul’da Hüsrev Kethudâ Vakfı’na bi’l-fi‘il mütevellî olan mefharu’s-sâdâti’l-kirâm Osman Ağa b. Abdülkadir meclis-i şer‘-i hatîrde Zeytun cemâ‘atinden olup bundan akdem hâlik olan Menahim nâm Yahûdinin sulbî kebîr oğulları ve tereke-i vâfiyesine vâzı‘u’l-yevd olan Mordehay ve Nesim nâm Yahûdiler muvâcehelerinde üzerlerine da‘vâ ve takrîr-i kelâm edip mezbûrân Mordehay ve Nesim’in babaları mezbûr Menahim vakf-ı mezbûr akarından mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup icâre-i mu‘accele ve senede altı bin altı yüz altmış akçe ücret-i mü’eccele ile mutasarrıf olduğu odaların ihrâk-ı kebîre gelince icâre-i mü’eccelesinden sekiz ayda müctemi‘ olan dört bin dört yüz kırk akçeyi kable’l-ahz ve’l-istifâ hâlik olup zimmetinde kalmış idi. Hâlâ tevliyetim hasebiyle meblağ-ı mezbûru mezbûrândan taleb ederim suâl olunup alıverilmek matlûbumdur dedikde gıbbe’s-suâl mezbûrân Mordehay ve Nesim cevâblarında fi’l-vâki‘ kazıyye minvâl-i muharrer üzere olduğunu her biri ikrâr ve i‘tirâf etmeğin ikrârları mûcebince meblağ-ı mezbûru mütevellî-i mezbûr es-Seyyid Osman Ağa’ya edâ ve teslîme mezbûrâna tenbîh birle mâ-vaka‘a bi’t-taleb ketb olundu. Fi’l-yevmi’s-sâlis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ebûbekir Çelebi b. Abdünnasır, Mehmed Çelebi b. Sıyami, Yusuf Çavuş el-mübâşir, Receb Çelebi b. Sefer, Ahmed Çelebi b. Abdülbaki.