İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 776 Hüküm no: 947 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Şahin b. Abdullah’ın Mustafa Efendi b. Yusuf’un kölesi olduğunun şahitlerle ispat edildiği Vilâyet-i Anadolu’da Eskişehir kasabasından olup mahmiye-i İstanbul’da müsâfiren sâkin olan hâfızü’l-vesîka Mustafa Efendi b. Yusuf nâm kimesne meclis-i şer‘de uzun boylu açık kaşlı gök elâ gözlü sarışın Rusiyyü’l-asl Şahin b. Abdullah mahzarında üzerine da‘vâ edip mezbûr Şahin eniştem olup bundan akdem tarîk-i hacda fevt olan el-Hâc Ahmed’in abd-i memlûkü olup fevt oldukda mezbûru zevce-i metrûkesi Fâtıma Hatun müteveffâ-yı mezbûr zimmetinde evvelden yüz elli riyâlî guruş mehr-i mü’ecceli mukābelesinde sâir veresesi rızâsıyla alıp kabz eyledikden sonra üç sene mukaddem yüz elli riyâlî guruşa mezbûre Fâtıma Hatun’dan ben iştirâ ve kabz edip târih-i kitâbdan yirmi ay mukaddem mülkümden ibâk etmiş idi el-hâletü hâzihî mezbûru kayıkcılık eder iken bulup rık olmak üzere istihdâm eylediğimde inkıyâd etmez suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsı için beyyine taleb olundukda kasaba-i mezbûre sükkânından olup udûl-i Müslimînden el-Hâc İbrahim b. Hasan ve Maden b. İbrahim nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ mezbûr Şahin müteveffâ-yı mezbûr el-Hâc Ahmed’in abd-i memlûkü olup fevt oldukda zevce-i metrûkesi mezbûre hatuna yüz elli riyâlî guruş mehr-i mü’eccel mukābelesinde verilip ba‘dehû üç sene mukaddem mezbûr Mustafa Efendi merkūmeden yüz elli riyâlî guruş mehr-i mü’eccel mukābelesinde verilip ba‘dehû üç sene mukaddem mezbûr Mustafa Efendi merkūmeden yüz elli riyâlî guruşa iştirâ ve kabz edip ba‘dehû mezbûr Şahin şuhûr-ı merkūmeden mukaddem merkūm Mustafa Efendi’nin mülkünden ibâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de ri‘âyeti şerâ’iti’’l-kabûl şehâdetleri makbûle oldukdan sonra mezbûru bey‘ veyâ hîbe [veyâhud] turûk-ı şer‘iyeden bir tarîkle mülkünden ihrâc eylemediğine mezbûr Mustafa ba‘de’t-tahlîf yemîn billâhi’l-aliyyü’l-azîm etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hasan Efendi b. ( ), Fahrü’l-müderrisîni’l-kirâm Mustafa Efendi, Keşfî Mustafa Efendi el-kâtib, Süleyman Beşe b. Osman, Ali Beşe b. Mustafa.