İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 777 Hüküm no: 948 Orijinal metin no: [124a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin mehir ve nafaka hususunda boşandığı kocası Ahmed Beşe b. Mehmed aleyhine açtığı davanın reddedildiği Mahmiye-i İstanbul’da Muhtesib İskender mahallesinde sâkine Âişe bt. Ali nâm hatun mahfil-i kazâda zevc-i mutallıkı işbu bâ‘isü’l-kitâb Ahmed Beşe b. Mehmed nâm kimesne mahzarında üzerine da‘vâ ve takrîr-i kelâm edip mezbûr Ahmed Beşe beni talâk-ı bâyin ile tatlîk etmeğin hâlâ zimmetinde mütekarrir ve ma‘kūdün-aleyh olan dört bin akçe mehr-i mü’eccelim ve nafaka-i iddet-i ma‘lûmem ve me’ûnet-i süknâmı mezbûr Ahmed Beşe’den taleb ederim suâl olunup alıverilmesi matlûbumdur dedikde gıbbe’s-suâl mezbûr Ahmed Beşe cevâbında târih-i kitâbdan on iki gün mukaddem müdde‘iye-i merkūme Âişe benim zimmetimde mütekarrir ve ma‘kūdün-aleyh olan dört bin akçe mehr-i mü’ecceli ve nafaka-i iddet-i ma‘lûmemi üzerlerine ve me’ûnet-i süknâsı dahi kendi üzerine olmak üzere benimle huzûr-ı Müslimînde muhâla‘a-i sahîha-i şer‘iye ile muhâla‘a edip ben dahi minvâl-i muharrer üzere sulh-ı mezbûru kabûl eyledim deyü def‘le mukābele edecek gıbbe’l-istintâk mezbûr Ahmed Beşe’den def‘-i mezbûrunu mübeyyine beyyine taleb olundukda udûl-i Müslimînden olup mahalle-i mezbûre mü’ezzini Süleyman Halîfe b. Mustafa ve Ak Şemseddin mahallesi mü’ezzini Halil Halîfe b. Mustafa nâm kimesneler li-ecli’ş-şehâdet meclis-i şer‘a hâzırân olup istişhâd olunduklarında fi’l-hakīka târih-i mezbûrede müdde‘iye-i mezbûre merkūme Âişe Hatun zevci mezbûr zimmetinde mütekarrir ve ma‘kūdün-aleyh olan dört bin akçe mehr-i mü’ecceli ve nafaka-i iddet-i ma‘lûmemi üzerine ve me’ûnet-i süknâsı olmak üzere bizim huzûrumuzda mezbûr Ahmed Beşe ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde gıbbe ri‘âyeti şerâ’iti’’l-kabûl [124b] şehâdetleri makbûle olmağın mûcebince müdde‘iye-i mezbûre Âişe’yi bî-vech mu‘ârazadan men‘ birle mâ-vaka‘a bi’t-taleb ketb olundu. Şuhûdü’l-hâl: Receb Efendi b. Ramazan, Musa Efendi [b.] Muharrem, Şahin Beşe b. Abdullah, el-Hâc Ahmed b. Mahmud, Mehmed kethudâ, Gazanfer b. Tevekkül.