İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 778 Hüküm no: 950 Orijinal metin no: [124b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Delirmiş olan Ali b. Bali üzerine kızkardeşinin oğlu Mustafa Çelebi b. Mahmud’un vasî tayin olunduğu Dârü’l-hilâfeti’l-aliyye Kostantıniyyeti’l-mahmiye’de Bakla mahallesinde sâkin Ali b. Bali nâm kimesnenin cünûn-ı mecnûne olup emvâlini zabt ve ahvâlini hıfza iktidârı olmayıp bir vasî nasb olunmak lâzım ve mühim olduğunu ahâlî-i mahalleden işbu hâzırûn bi’l-meclis Ebûbekir Efendi b. Musa ve Mehmed Efendi b. Musa ve Mustafa b. Hızır ve Murad b. Ahmed ve el-Hâc Mehmed b. Hüseyin ve İbrahim b. Abdullah ve İsa b. Ebûbekir ve Hasan b. Abdullah nâm kimesneler ve sâirleri ihbâr etdiklerinden sonra mezbûr Ali’nin hemşîrezâdesi bâ‘isü’r-rakīm Mustafa Çelebi b. Mahmud dîndâr ve müstakīm ve vesâyet uhdesinden gelmeğe kādir olduğunu dahi mezbûrûn haber verdiklerinde mezbûr Mustafa Çelebi mezbûr Ali’nin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-seneti’l-merkūme. Şuhûdü’l-hâl: Şükrullah b. Mustafa, Abdi b. Hüseyin, Mehmed b. Ramazan, Hasan b. Bayram, Hasan b. Mehmed.