İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 779 Hüküm no: 951 Orijinal metin no: [124b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. İbrahim’in Hacı Bayram b. Mustafa’ya mülk menzilini satıp toplam bin üç yüz dönüm tarlalarının da kullanım hakkını devrettiği Vilâyet-i Anadolu’da Aydın Sancağı’nda Güzelhisar kasabasında Yaka mahallesinde sâkin es-Seyyid Mustafa Ağa b. İbrahim meclis-i şer‘-i hatîrde işbu râfi‘u’l-kitâb el-Hâc Bayram b. Mustafa mahzarında ikrâr ve takrîr-i kelâm edip Sobıca kazâsına tâbi‘ Çıkmaz nâm karyede vâki‘ üç tarafdan yine benim tarlalarıma ve bir tarafdan tarîka müntehî iki bâb tahtânî beyti ve havluyu müştemil çiftlik ta‘bîr olunur mülk menzilimi ve içinde mevcûd olan beş karasığır öküzümü bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr el-Hâc Bayram’a bâtten doksan esedî guruşa bey‘ edip ol dahi iştirâ eyledikden sonra yine çiftlik-i mezbûr ile tasarruf olunup karye-i mezbûre hudûdunda vâki‘ ma‘lûmü’l-hudûd ve’l-kıt‘a bin dönüm tarlalarımın hakk-ı tasarrufunu sahib-i arz ma‘rifetiyle yedi yüz on esedî guruşa mezbûr el-Hâc Bayram’a ferâğ ve tefvîz ve dahi kazâ-i mezbûra tâbi‘ Halilbeyli nâm karyede vâki‘ ma‘lûmü’l-hudûd ve’l-kıt‘a üç yüz dönüm tarlalarımın hakk-ı tasarrufunu mezbûr el-Hâc Bayram’a iki yüz esedî guruşa ferâğ ve tefvîz o dahi minvâl-i muharrer üzere tefevvüz ve kabûl eyledikden sonra semen-i mezbûr doksan esedî guruş ile bedel-i tefvîz olan dokuz yüz on esedî guruş ki cem‘an bin kıt‘a esedî guruşu tamamen mezbûr el-Hâc Bayram yedinden alıp kabz edip menzil-i mahdûd-ı mezbûr ile sâbıku’z-zikr tarlaları mahallerinde kabz ve tasarrufa mezbûr el-Hâc Bayram’ı taslît eyledim dedikde mukırr-ı mezbûru kelimâtında mezbûr el-Hâc Bayram vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi b. Abdullah el-kādî, Arnavudzâde Ali Bey, Piyale Bey b. Abdullah, Selim Beşe er-râcil, Sarrâc Hasan Çelebi.