İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 780 Hüküm no: 952 Orijinal metin no: [124b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Hacı Bayram’a mülk içerisindeki hayvanlarla birlikte menzilini satıp toplam bin dönüm tarlalarının da kullanım hakkını devrettiği Vilâyet-i Anadolu’da Aydın Sancağı’nda Güzelhisar kasabasında Yaka mahallesinde sâkin es-Seyyid Mustafa Ağa b. es-Seyyid İbrahim meclis-i şer‘-i hatîrde işbu râfi‘u’l-kitâb el-Hâc Bayram [b.] Mustafa mahzarında ikrâr ve takrîr-i kelâm edip vilâyet-i mezbûrede Sığacık Sancağı’nda vâki‘ Azine [Ezine] kazâsına tâbi‘ Argavlı nâm karyede vâki‘ etrâf-ı erba‘ası tarîk-i âm ile mahdûd olup dört bâb tahtânî oda ve havluyu ve bir samanlık ve ahırı müştemil mülk çiftlik ta‘bîr olunur menzilimi ve içinde mevcûd olan on çift karasığır öküzü [125a] ve yüz re’s sağmal koyun ve on re’s kısrağımı üç yüz esedî guruşa mezbûr el-Hâc Bayram’a bâtten bey‘ edip ol dahi minvâl-i muharrer üzere iştirâ ve kabûl eyledikden sonra yine karye-i mezbûre sınırı ve hudûdu dâhilinde vâki‘ çiftlik-i mezbûr ile zabt u tasarruf olunan ma‘lûmü’l-hudûd ve’l-kıt‘a beş yüz dönüm tarla ve dahi Mahmudlu nâm karyede vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a beş yüz dönüm tarlalarımın hakk-ı tasarrufların sahib-i arzların izin [ve] ma‘rifetleriyle altı yüz elli kıt‘a esedî guruş bedel mukābelesinde mezbûr el-Hâc Bayram’a ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra cem‘an semen-i mezkûr ile bedel-i tefevvüz-ı mezbûr dokuz [yüz] elli esedî guruşu bi’t-tamam ve’l-kemâl mezbûr el-Hâc Bayram yedinden alıp kabz edip menzil-i mezbûr ile zikri sebk eden tarlaları mahallerinde kabz u tasarrufa mezbûr el-Hâc Bayram’ı taslît eyledim dedikde mukırr-ı mezbûr cemî‘ kelimâtında mezbûr el-Hâc Bayram vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.