İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 780 Hüküm no: 953 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bir müddet başka diyara giden Mustafa Bey b. Yusuf’un başkası ile evlenen karısının kendisine iade edildiği Mahmiye-i İstanbul’da Monla Gürânî mahallesi sâkinlerinden bâ‘isü’l-kitâb Mustafa Bey b. Yusuf mahfil-i kazâda Râziye bt. Nasuh nâm hatun ile Piyale b. Abdullah mahzarında üzerlerine da‘vâ ve takrîr-i kelâm edip merkūme Râziye târih-i kitâbdan yirmi sene mukaddem dört bin akçe mehr-i mü’eccel-i müsemmâ üzere nefsini bana tezvîc ben dahi tezevvüc ve kabûl edip zevciyet beynimizde kāime iken ben âhar diyâra gitmekle merkūme Râziye nefsini mezbûr Piyale’ye tezvîc eylemişdir suâl olunup yine zevcem bana alıverilmek matlûbumdur dedikde gıbbe’s-suâl mezbûr Piyale cevâbında merkūme Râziye târih-i kitâbdan bir ay mukaddem bin akçe mehr-i mü’eccel-i müsemmâ üzerine zevcim yokdur deyü şâhideyn mahzarında nefsini bana tezvîc ben dahi minvâl-i muharrer üzere tezevvüc ve kabûl eyledim deyü mezkûr Mustafa’nın zevcesi olup zevciyet elân beynlerinde kāime olduğu ma‘lûmum değildir deyü inkâr edicek müdde‘î-i mezkûr Mustafa’dan müdde‘âsını mübeyyine beyyine taleb olundukda udûl-i Müslimînden Osman b. Ali ve İlyas b. Arzuman nâm kimesneler meclis-i şer‘de hâzırân olup isre’l-istişhâd fi’l-hakīka merkūme Râziye târih-i kitâbdan yirmi sene mukaddem mezkûr Mustafa’ya dört bin akçe mehr-i mü’eccel üzerine bizim huzûrumuzda nefsini tezvîc ol dahi tezevvüc, kabûl eyledi biz bu husûsa vech-i meşrûh üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın müdde‘î-i mezkûr Mustafa’ya merkūme Râziye kendiden elân mübâne olmadığına yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ömer Ağa b. Hızır. Mehmed Ağa b. Mustafa, Hasan Beşe b. Ramazan, Şükrullah b. Mustafa, Abdi Çelebi b. Hüseyin, Mehmed b. Ramazan.