İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 781 Hüküm no: 954 Orijinal metin no: [125a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi b. Mustafa’nın küçüklüğünde vasîsi olan Mustafa b. Yakub’un zimmetini alacak verecek hususunda ibra ettiği Mahmiye-i İstanbul’da Kalenderhâne mahallesinde sâkin iken bundan akdem vefât eden Mustafa Çelebi b. Himmet’in sulbî kebîr oğlu Mahmud Çelebi meclis-i şer‘-i hatîrde hâl-i sıgārında vasîyy-i şer‘îsi olan işbu râfi‘u’l-kitâb Mustafa Efendi b. Yakub mahzarında tâyi‘an ikrâr ve takrîr-i kelâm edip mezbûr Mustafa Efendi zamân-ı sıgārımda vasîyy-i şer‘îm olup babamdan bana intikāl eden dört yüz doksan yedi buçuk riyâlî guruş-ı kebîr nakd ve sûk-ı sultanîde bey‘ olunan eşyâ semenlerinden yirmi üç bin altı yüz otuz yedi akçe ve dahi vazîfelerimden kabz eylediği kırk beş bin yedi yüz yetmiş iki akçe ki cem‘an dört yüz doksan yedi buçuk riyâlî kebîr guruş ile yetmiş altı bin dokuz akçe mâlın bundan akdem ben bâliğ ve âkıl ve reşîd ve akıl ve sedâda vâsıl olduğumdan iznim ile bazısını akārâta ve bazısını binâ eylediğim menzile sarf ve harc edip bâkī kalan beynimizde aded ve evsâfı ma‘lûm meblağı tamamen yedinden alıp kabz eyledim ba‘de’l-yevm vasîyy-i mezbûr Mustafa Efendi yedinde bir akçe ve bir habbe hakkım bâkī kalmayıp husûs-ı mezbûra müte‘allika cemî‘ de‘âvîden mezbûr Mustafa Efendi’nin zimmeti berîdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Himmet Efendi b. Ebûbekir türbedâr-ı Rüstem Paşa, el-Hâc Mehmed b. İsa, Mehmed Efendi b. Mahmud, Mehmed Efendi el-müezzin bi-câmi‘i Şehzâde, Ali Çelebi el-kayyûm bi-câmi‘i Şehzâde, Mehmed Halîfe b. İbrahim ve gayruhum.