İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 792 Hüküm no: 958 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapbaşı Yamandi v. Yuri’nin alacağına kefîl olduğu iddiasıyla Mizistre eski kadısı Halil Efendi b. İbrahim aleyhine açtığı davanın reddi Medîne-i Galata tevâbi‘inden Ortaköy nâm karyede sâkin olup sâbıkā Galata Saray kasabbaşısı olan Yamandi v. Yuri nâm zimmî meclis-i şer‘de sâbıkā Mizistre kādısı olan umdetü’l-kuzât Halil Efendi b. İbrahim mahzarında üzerine da‘vâ ve takrîr-i kelâm edip Badracık ve tevâbi‘i mukāta‘asını bin altmış dört senesinde taraf-ı mîrîden üç yük elli bin akçeye ben iltizâm ve kabûl edip zabt sadedinde iken Hüseyin Ağa nâm kimesneye dört yük elli bin akçeye der-uhde edip mukāta‘a-i merkūmeyi tamam zabt ve mâlı tahsîl eyledikden sonra meblağ-ı mezbûrun üç yük doksan bin akçesini merkūm Hüseyin Ağa bana teslîm edip zimmetinde altmış bin akçe hakkım kaldıkda bâkī kalan meblağ-ı mezbûr altmış [bin] akçeye merkūm Halil Efendi’nin altmış altı senesi Saferü’l-hayr’ının üçüncü gününden yüz yirmi gün tamamına dek kefîl olmuş idi hâlâ kefâleti hasebiyle meblağ-ı mezbûru merkūm Halil Efendi’den taleb ederim suâl olunsun dedikde gıbbe’s-suâl mezbûr Halil Efendi cevâbında fi’l-vâki‘ meblağ-ı mezbûra yevm-i merkūmdan yüz yirmi gün tamamına dek kefîl olduğun ikrâr lâkin müddet-i merkūme içinde meblağ-ı mezbûru benden taleb etmeyip [130a] müddet-i merkūme münkaziye olmağla kefâlet-i merkūmeden zimmetim berî olmuşdur bu bâbda hâlâ şeyhülislâm sellemehü’s-selâm hazretlerinden yedimde fetvâ-yı şerîfe vardır deyü takrîr-i meşrûhuna muvâfık fetvâ-yı şerîfe ibrâz etmeğin ba‘de’n-nazar müdde‘âsına muvâfık olmağın mezbûr Yamandi bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Ahmed Efendi, Yusuf Çavuş b. Abdullah el-mübâşir, Mehmed Çelebi, Şaban b. Hüseyin, Mehmed Ağa, Yusuf b. İbrahim.