İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 793 Hüküm no: 959 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime bt. Mehmed Ağa’nın menzil hissesi hususunda Hacı Hasan b. Abdullah ile davasının olmadığını ikrar ettiği Mahrûse-i Üsküdar’da Takyeci el-Hâc Cafer mahallesinde sâkin iken bundan akdem fevt olan Mehmed Ağa b. Mehmed’in verâseti sulbî kebîr [oğlu] Ali’ye ve sulbiye kebîre kızı Halime Hatun’a münhasıra olduğu şer‘an zâhir ve müte‘ayyin oldukdan sonra mezbûre Halime Hatun meclis-i şer‘-i şerîf-i lâzımü’t-teşrîfde zikri câ’î menzile vâzı‘u’l-yed olan bâ‘isü’l-kitâb el-Hâc Hasan b. Abdullah mahzarında ikrâr ve i‘tirâf edip mahalle-i mezbûrede vâki‘ bir tarafı ba‘zan Hekîmbaşızâde Ahmed Çelebi ve ba‘zan Âişe Hatun mülklerine ve bir tarafı İbadî Abdullah mülküne ve bir tarafı ba‘zan Rahime Hatun ve ba‘zan Veli nâm kimesne mülküne ve bir tarafı tarîk-i âmma müntehî menzil müteveffâ-yı mezbûr Mehmed Ağa’nın ile’l-vefât mülkü olup ba‘de vefâtihî menzil-i mezbûr üç sehm i‘tibâr olunmağla sihâm-ı mezbûrenin bir sehmi bana ve iki sehmi mezbûr Ali’ye isâbet ve intikāl etmekle mezbûr Ali iki sehm hissesini mukaddemâ huzûr-ı hâkimü’ş-şer‘de mezbûr el-Hâc Hasan’dan da‘vâ ol dahi müteveffâ-yı mezbûr hayatında hâlesi Sâliha Hatun’a iki yüz elli riyâlî guruşa bâtten bey‘ ve teslîm ol dahi ba‘de’t-tesellüm bana kırk beş bin akçeye bey‘ ve teslîm ben dahi iştirâ ve kabûl ve kabz etmişimdir deyü def‘ ve def‘-i mezkûrunu şuhûd ve udûlle muvâcehesinde isbât edip mezbûr Ali mu‘ârazadan men‘ olunmuşidi el-hâletü hâzihî benim dahi menzil-i mezbûra müte‘allika mezbûr el-Hâc Hasan ile da‘vâ ve nizâ‘ım ve alâka ve medhalim yokdur da‘vâ dahi edersem lede’l-hükkâm mesmû‘ olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Murad Bey el-cündî, Hasan b. Abdullah, İbrahim b. Hasan, Şükrullah b. Mustafa, Hasan Bey b. Ali, Rasûl b. Rıdvan, Hüseyin b. Abdullah, Mustafa Bey b. ( ) bevvâb-ı sultanî.