İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 794 Hüküm no: 960 Orijinal metin no: [130a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz Beşe b. Hasan’ın mülk menzilini karısı Handan bt. Abdullah’a geri dönüşü olmak üzere belirli bir süreliğine sattığı Mahmiye-i İstanbul’da Hacı Kasım Gönânî mahallesinde sâkin İvaz Beşe b. Hasan nâm kimesne meclis-i şer‘-i hatîrde hâlâ Mısr-ı Kāhire vâlîsi olan İbrahim Paşa’nın mu‘takalarından işbu râfi‘atü’l-kitâb zevcesi Handan bt. Abdullah mahzarında ikrâr edip akd-i âtî sudûruna dek silk-i mülkümde olup mahalle-i mezbûrede vâki‘ bir tarafdan Ebûbekir Ağa mülküne ve bir tarafdan Kuloğlanı Mehmed mülküne ve bir tarafdan habbâz fırınına ve bir tarafdan tarîk-i âmla mahdûd üç bâb fevkānî odaları ve bir fevkānî matbahı ve iki bâb tahtânî odayı ve mezbûr Ebûbekir Ağa ile müşterek bir su kuyusunu ve zât-ı eşcâr bahçesini müştemil menzilini ve içinde mevcûd olan esâs-ı beyt ve evânî-i nühâs ve gayr-ı nühâs ve sâir kalîl ve kesîr, celîl ve fakīr cehâleti nâfî eşyâ-yı memlûkemi bi-safkatin vâhidetin zevcem mezbûre Handan Hatun’a bey‘ bi’l-vefâ tarîki üzere her biri yedişer dirhem gelir üç yüz elli beş riyâlî guruşa târih-i kitâb senesi Cumâdelâhire’sinin on beşinci gününde bir sene tamamına dek mü’eccel olmak üzere bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr üç yüz elli beş riyâlî guruşu tamamen mûmâ-ileyhâ Handan Hatun yedinden kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi el-imâm be-mahalle-i mezbûre, Mehmed Çelebi el-müezzin, Şaban el-müezzin, Şaban Beşe el-attar, Mehmed Bey el-bevvâbü’s-sultanî.