|
İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 794 Hüküm no: 961 Orijinal metin no: [130a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ali Çelebi ve İsmail’in Gülzar Hatun Vakfın’dan aldıkları borç karşılığında mülk değirmenlerini vakfa rehin verip bir yıllığına kiraladıkları
Mahmiye-i İstanbul’da Debbağyunus mahallesi sükkânından Ali Çelebi ve İsmail ibney Ahmed nâm karındaşlar meclis-i şer‘-i hatîrde mahmiye-i mezbûrede Çerâğī Hamza mahallesinde vâki‘ Gülzar Hatun nâm sahibetü’l-hayrın nükūd-ı mevkūfesine bi’l-fi‘il mütevellî olan işbu râfi‘u’l-kitâb Receb Bey b. Süleyman nâm kimesne mahzarında her biri tâyi‘an ikrâr ve takrîr-i kelâm edip Vilâyet-i Anadolu’da İznikmid (İzmit) kazâsına tâbi‘ Sığırlık nâm karye deresinde vâki‘ mâ-i cârî ile dâir olup Kasımoğlu Değirmeni demekle ma‘rûf tahdîd ve tavsîfden müstağnî iki göz mülk-i mevrûsumuz olan değirmenleri yirmi akçeye istiğlâl-ı şer‘î tarîki üzere mütevellî-i mezbûr Receb Bey’e bundan akdem bey‘ ve teslîm ol dahi mal-ı vakf-ı mezbûr ile minvâl-i muharrer üzere iştirâ ve tesellüm ve kabûl edip [130b] semen-i mezbûru yedinden tamamen alıp kabz eylediğimden sonra yine zikri sebk eden değirmeni târih-i kitâbdan bir sene tamamına dek ba‘de’t-tahliyeti’ş-şer‘iye [ve’t]-tekābuzi’l-mer‘î üç bin akçe ücret-i mü’eccele ile mütevellî-i mezbûrdan istîcâr ve tesellüm ve kabûl ol dahi minvâl-i muharrer üzere îcâr ve teslîm eyledi dediklerinde mukırrân-ı mezbûrânı kelimât-ı muharrerelerinde mütevellî-i mezbûr Receb Bey bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu.
Fi’l-yevmi’s-sâmin min-Zilhicceti’ş-şerîfe li-sene isneteyn ve seb‘în ve elf.
Şuhûdü’l-hâl: İbrahim Bey b. Mehmed, Abdi Beşe b. Nurullah, Abdülkerim b. Abdi, İbrahim b. Cafer, Abdullah Efendi b. İbrahim, Ali Çelebi b. Mehmed.
|