İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 795 Hüküm no: 962 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mustafa’nın borcuna karşılık olarak tasarrufunda bulunan vakıf menzilin kullanım hakkını Mustafa Efendi b. Yusuf’e devrettiği Mahmiye-i İstanbul’da Bıçakcı mahallesinde sâkin Ali Beşe b. Mustafa nâm kimesne meclis-i şer‘de Mustafa Efendi b. Yusuf mahzarında tav‘an ikrâr ve takrîr-i kelâm edip mezbûr Mustafa Efendi işbu uzun boylu açık kaşlı gök elâ gözlü sarışın Rusiyyü’l-asl Şahin b. Abdullah nâm abd-i memlûkünü yüz elli esedî guruşa bana bey‘ ve teslîm ben dahi minvâl-i muharrer üzere iştirâ ve tesellüm eyledikden sonra kırk esedî guruşu kendiye verip bâkī kalan yüz on esedî guruşu âcilen vermeye kudretim olmamağla mahalle-i merkūmede vâki‘ Mustafa Bey Vakfı’ndan olup bir tarafı Abdülkerim mülküne ve bir tarafı İbrahim mülküne ve bir tarafı Soğancıoğlu mülküne ve bir tarafı tarîk-i hâssa müntehî bir bâb fevkānî ve bir tahtânî odaları ve kenîfi ve bi’r-i mâyı icâre-i mu‘accele ve yevmî bir akçe ücret-i mü’eccele ile mutasarrıf olduğum menzil mütevellîsi işbu hazır bi’l-meclis İmâm Mehmed Efendi izni ile yüz on esedî guruş bedel mukābelesinde mezbûr Mustafa Efendi’ye ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra bedel-i mezbûr yüz on esedî guruş kendiye rehnim olan yüz on esedî guruş mukābelesinde takās eylediğimde ol dahi mukāssa ve kabûl eyledi min-ba‘d ol menzil-i mezbûr hakk-ı müfevvazı olup mutasarrıf olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Musa b. Seydi, Ahmed Çelebi b. Mahmud, Kethudâ-yı muhzırân Abdullah Çelebi b. Ahmed, Adem Çelebi b. Ahmed, Hüseyin Efendi b. ( ), Baba Rasûl b. ( ) el-muhzır, Abdi Çelebi b. Hüseyin el-muhzır, Şükr[ullah] Bey b. Mustafa el-muhzır.