İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 796 Hüküm no: 963 Orijinal metin no: [130b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Abdurrahman’ın Arnavud Ali Bey’de olan alacağını tahsil edip zimmetini ibra ettiği Mahmiye-i İstanbul’da Gül Câmi‘i mahallesi sâkinlerinden Ahmed Beşe b. Abdurrahman meclis-i şer‘-i hatîrde işbu bâ‘isü’l-kitâb Arnavud Ali Bey tarafından ikrâr-ı âti’l-beyânı tasdîka vekîl olup el-Hâc Şaban [b.] Ebûbekir ve Yahya b. Hüseyin nâm kimesneler şehâdetleri ile vekâleti sâbite olan Mehmed Çelebi mahzarında ikrâr ve takrîr-i kelâm edip müvekkil-i mezbûr Ali Bey zimmetinde cihet-i karz-ı şer‘îden kırk riyâlî guruş hakkım olup meblağ-ı mezbûru müvekkil-i mezbûr Ali Bey yedinden tamamen ahz u kabz edip zimmetinde bir akçe hakkım bâkī kalmadı dedikde mukırr-ı mezbûr Ahmed Beşe’nin vech-i muharrer üzere ikrârını vekîl-i mezbûr Mehmed Çelebi vicâhen tasdîk, şifâhen tahkīk edecek mâ-vaka‘a bi’t-taleb ketb olundu. Fi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ziver b. Abdullah, aşçı Mehmed, el-Hâc Mahmud b. Hüseyin, bostancı Ali Bey, Baba Rasûl b. Rıdvan.