İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 797 Hüküm no: 966 Orijinal metin no: [131a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi b. Abdullah’a vekili Musa Bey b. Ali Bey aleyhine açtığı alacak davasında iddiasını ispat için süre verildiği Mahmiye-i İstanbul’da Ali Paşa-yı Atîk mahallesinde sâkin işbu kitâbın sahibi fahru erbâbü’t-tahrîr ve’l-kalem Yusuf Efendi b. Abdullah meclis-i şer‘-i hatîrde Musa Bey b. Ali Bey nâm kimesne mahzarında üzerine da‘vâ ve takrîr-i kelâm edip bundan akdem Vilâyet-i Rumeli’nde olup merhûm Sultan Selim Han Evkāfı’ndan Akkirman cibâyetini ale’l-iştirâk mutasarrıflar olan Müteferrika Mehmed Ağa ve Celeb Ali Ağa zimmetlerinde olan her kîsesi beşer yüz esedî guruş olmak üzere dört kîse esedî guruş ve dahi her biri sekizer dirhem olmak üzere sekiz kîse riyâlî guruş hakkımı mezbûrân Mehmed Ağa ve Ali Ağa’dan ahz u kabz ve bana îsâle mezbûru tarafımdan vekîl nasbedip ol dahi ba‘de kabûlü’l-vekâle Akkirman’a varıp meblağ-ı mezbûru merkūmândan kabz eyledikden sonra her kîsesi ellişer bin akçe olmak üzere on kîseyi bana îsâl ve teslîm ve ben dahi ahz u kabz eyledim idi hâlâ suâl olunup mâ‘adâsını dahi alıverilmek murâdımdır dedikde gıbbe’s-suâl vekîl-i mezbûr Musa Bey cevâbında müdde‘î-i mezbûrun merkūmân Mehmed Ağa ve Ali Ağa’da olan akçesinden bi’l-vekâle ancak beş yük kırk bin akçesin ahz edip makbûzum olan beş yük kırk bin akçeden i‘tirâfı mûcebince beş yük akçesin kendiye teslîm edip bâkī kalan kırk bin akçesin kendi mesârıfıma sarf ile istihlâk etmekle meblağ-ı bâkī-i mezbûr zimmetimde edâsı lâzım deynimdir deyü beş yük kırk bin akçeden ziyâde kabzını inkâr edicek müdde‘î-i mezbûrdan Musa Bey’in ziyâde kabzını mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrârı mertebesi olan kırk bin akçeyi müdde‘î-i mezbûra edâya, teslîme tenbîh birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud, Şükrullah b. Mustafa, Baba Rasûl b. Rıdvan, Abdi b. Hüseyin, Veli b. Mahmud ve gayruhum.