|
İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 798 Hüküm no: 967 Orijinal metin no: [131a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed Çelebi ve oğlu Mustafa’nın miras hususunda Mehmed Kadri Efendi ve Emetullah Hatun ile sulh olup zimmetlerini ibra ettikleri
Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İslambol’da Monla Ahî mahallesinde vâki‘ merhûm Kemâl Efendizâde Efendi’nin menzil-i âlîlerine varıp zeyl-i rakīmde mastûrü’l-esâmî Müslimîn huzûrunda akl-ı meclis-i şer‘-i kavîm eyledikde mahmiye-i mezbûrede Çerâğī Hamza mahallesinde sâkin iken bundan akdem azm-i dârü’s-selâm eden merhûm ve mağfûr dâric ilâ medâric rahimehû Rabbühü’l-gafûr İmâmzâde Şeyh Mehmed Efendi’nin verâseti sulbî kebîr oğlu umdetü’l-müderrisîni’l-kirâm zübdetü’l-müdekkıkīni’l-fihâm Mehmed Kadri Efendi’ye ve sagīr oğlu Ahmed Çelebi’ye ve kebîre kızı umdetü’l-muhadderâti’l-kirâme Emetullah Hatun’a ve sagīre kızları Âlime ve Râbia’ya münhasıra olup kable’l-kısme mezbûre Râbia dahi vefât edip verâseti vâlidesi diğer Râbia bt. Abdullah ve li-ebeveyn karındaşı mezbûr Ahmed Çelebi’ye münhasıra olup kable’l-kısme mezbûr Ahmed Çelebi dahi vefât edip verâseti vâlidesi mezbûre diğer Râbia Hatun’a ve li-üm karındaşları Mustafa ve Hamide’ye ve li-eb er karındaşı mûmâ-ileyh Mehmed Kadri Efendi ile kezâlik kız karındaşı merkūme Emetullah Hatun’a münhasıra olup kable’l-kısme mezbûre diğer Râbia dahi vefât edip verâseti zevc-i metrûkü Mehmed Çelebi’ye ve sadrî sagīr oğlu Mustafa ve sagīre kızı Hamide’ye münhasıra olup kable’l-kısme mezbûre Hamide dahi vefât edip verâseti babası mezbûr Mehmed Çelebi’ye münhasıra olduğu ve bi-tarîkı’l-münâsahati’l-mezkûre tashîh-i mes’eleleri yüz kırk dört sehimden olup sihâm-ı mezbûreden kırk sehmi mûmâ-ileyh Mehmed Kadri Efendi’ye ve yirmi sehmi müşârün-ileyhâ Emetullah Hatun’a ve kırk iki sehmi sagīr-i mezbûr Mustafa’ya ve kırk iki sehmi dahi mezbûr Mehmed Çelebi’ye isâbet ve intikāl eylediği şer‘an zâhir ve mütehakkık oldukdan sonra mezbûr Mehmed Çelebi kendi cânibinden asâleten ve sulbî oğlu sagīr-i mezbûr Mustafa tarafından velâyeten meclis-i ma‘kūd-ı [131b] mezbûrda müteveffiyyûn-ı mezbûrûnun terekelerine vâzı‘ayi’l-yed oldukları şer‘an sâbit olan işbu râfi‘ayi’l-kitâb mûmâ-ileyh Mehmed Kadri Efendi ve müşârün-ileyhâ Emetullah Hatun tarafından husûs-ı âti’z-zikre vekîl olup nehc-i şer‘î üzere vekâleti sâbite olan halîli Halebli ekmelü’l-müderrisîni’l-kirâm efdalü’l-muhakkıkīni’l-kirâm Ahmed Efendi neclü’l-mevle’l-merhûm İbrahim mahzarlarında tâyi‘an ikrâr ve takrîr-i kelâm edip velisi olduğum sagīr oğlum mezbûr Mustafa’ya karındaşı müteveffâ-yı mezbûr Ahmed Çelebi ile vâlidesi mezbûre diğer Râbia Hatun’dan bi-tarîkı’l-münâsahati’l-mezkûre isâbet eden kırk sehm hisse-i şer‘iyesi mukābelesinde intikāl elli sekiz bin yüz yetmiş akçeyi velâyetim hasebiyle bi’t-tamam ve’l-kemâl mûmâ-ileyh Mehmed Kadri Efendi ile vekîl-i müşârün-ileyh Ahmed Efendi yedlerinden sagīr-i mezbûr için ahz u kabz eylediğimden sonra bana isâbet eden kırk iki sehm hisse-i şer‘iyem mukābelesinde şerâyit-i hüccet-i sulhu hâvî mevâni‘den ârî tehârüc-i şer‘î tarîki üzere mûmâ-ileyh Mehmed Efendi ve vekîl-i müşârün-ileyh Ahmed Efendi benimle on altı bin nakd-i râyic fi’l-vakt akçe üzerine inşâ-i akd-i sulh eylediklerinde mezbûru kabûl ve bedel-i sulh olan meblağ-ı mezbûr on altı bin akçeyi dahi mûmâ-ileyhimâ Mehmed Kadri ve Ahmed Efendi yedlerinden tamamen alıp kabz eyledim ba‘de’l-yevm müteveffiyûn-ı mezbûrûnun akār ve menkūl cümle terekelerine müte‘allika da‘vâ ve nizâ‘ ve alâka ve medhalim kalmadı dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ba‘dehû ma‘an ba‘s olunan İsmail b. Mehmed ile meclis-i şer‘a gelip alâ-vukū‘ihî inhâ ve takrîr eyledikde mâ hüve’l-vâki‘ bi’t-taleb ketb olundu.
Fi’l-yevmi’s-sâmin min-Zilhicceti’ş-şerîfe li-sene isneteyn ve seb‘în ve elf.
Şuhûdü’l-hâl: Abdülkerim Efendi b. Abdullah, Mehmed Efendi b. Mustafa, Abdülbaki Efendi b. Kara Mehmed, Mustafa Çelebi b. Ahmed, Kadri Çelebi b. Süleyman, Ahmed b. Mehmed Çelebi.
|