İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 799 Hüküm no: 968 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mehmed Kadri Efendi’nin Mustafa Çelebi b. Ahmed Vakfı’na olan borcuna karşılık olarak Rumelihisarı’ndaki menzilini rehin verdiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Molla Ahî mahallesinde vâki‘ merhûm Kemâl Efendizâde Efendi’nin menzil-i âlîlerine varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mahmiye-i mezbûrede Çerâğī Hamza mahallesinde sâkin umdetü’l-müderrisîni’l-kirâm zübdetü’l-müdekkıkīni’l-fihâm Mehmed Kadri Efendi neclü’l-mevla’l-merhûmi’l-mebrûru’d-dârici’l-medâric rahmetü rabbihi’l-gafûr Şeyh Mehmed Efendi meclis-i ma‘kūd-ı mezbûrda meşrûtiyyet üzere kendi vakfına mütevellî olan işbu râfi‘u’l-kitâb fahrü’l-emâsil Mustafa Çelebi b. Ahmed mahzarında ikrâr ve takrîr-i kelâm edip vakf-ı mezbûr mâlından olmak üzere bi-tarîkı’l-mu‘âmeleti’ş-şer‘iye mezbûr Mustafa Çelebi yedinden bin beş yüz kıt‘a esedî guruşu ahz u kabz ve yedinden iştirâ ve kabz ve tesellüm eylediğim bir Mushaf-ı şerîf hediyesinden dahi iki yüz yirmi beş esedî guruş ki cem‘an vakf-ı mezbûra zimmetimde lâzımü’l-edâ ve vâcibü’l-kazâ bin yedi yüz yirmi beş esedî guruş deynim vardır ve meblağ-ı mezbûr mukābelesinde mahrûse-i Galata Kazâsı muzâfâtından Rumelihisarı’nda vâki‘ bir tarafdan Hisarbeyi Limanı’na ve bir tarafdan Âişe Hatun ve ba‘zan Çadırcızâde mülküne ve bir tarafdan tarîk-i âm ve ba‘zan âhar mülküme ve bir tarafdan sâhil-i bahre müntehî olup büyût-ı adîdeyi hâvî mülk menzilim rehn-i mevzû‘dur dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ba‘dehû ma‘an ba‘s olunan İsmail b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn