İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 801 Hüküm no: 970 Orijinal metin no: [132a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Murtaza’nın şahitler huzurunda cariyesi Cihanşah’ı azat ettiğinin ispat olunduğu İşbu bâ‘isetü’r-rakīm açık kaşlı sarı elâ gözlü orta boylu Rusiyyetü’l-asl Cihanşah bt. Abdullah meclis-i şer‘de Ali Beşe b. Murtaza mahzarında üzerine takrîr-i da‘vâ edip ben mezbûr Ali Beşe’nin câriye-i memlûkesi olup mülkünde olduğum hâlde beni târih-i kitâbdan on gün mukaddem beni âzad eylediğini huzûr-ı Müslimînde ikrâr dahi etmiş iken bana rıkkıyet üzere mezbûr Ali Beşe vaz‘-ı yed eder suâl olunup kasr-ı yedine tenbîh olunması murâdımdır dedikde gıbbe’s-suâl mezbûr Ali Beşe husûs-ı mezbûru bi’l-külliye inkâr edicek müdde‘iye-i mezbûreden müdde‘âsını mübeyyine beyyine taleb olundukda mahmiye-i İstanbul’da Monla Gürânî mahallesinde Ahmed Efendi b. İbrahim ve Bayram b. Mahmud ve Ahmed Bey b. Hasan nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Ali Beşe târih-i kitâbdan üç gün mukaddem huzûrumuzda câriyem Cihanşah âzadlımdır deyü ikrâr ve bizi işhâd eyledi biz bu vechile mezbûre Cihanşah’ın sâir harâ’ir-i asliyât gibi hürre olduğuna şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr Ali Beşe’ye kasr-ı yedine tenbîh olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Umdetü’l-müderrisîni’l-kirâm Hasan Efendi, el-Hâc Muslı, Mehmed Beşe b. Abdullah, Ali Beşe b. Abdullah, Ahmed Çavuş b. Sefer, Hasan Çelebi.