İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 801 Hüküm no: 971 Orijinal metin no: [132a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçok v. Agob’un Bedros v. Tato’ya olan borcunu taksitle ödemeye söz verdiği Mahmiye-i İstanbul’da habbâz tâifesinden hâmil-i hâze’s-sifr Haçok v. Agob nâm Ermeni meclis-i şer‘-i hatîrde yine tâife-i mezbûreden Bedros v. Tato nâm Ermeni muvâcehesinde ikrâr ve takrîr-i kelâm edip her biri üçer yüz akçe hesâbı üzere yirmi aded yaldız altını ve dahi her biri yüz yirmişer akçe hesâbı üzere kırk dokuz riyâlî guruş ki cem‘an mezbûre on bir bin sekiz yüz seksen akçe zimmetimde mezbûr Bedros’a deynim olup lâkin meblağ-ı mezbûru hâlâ merkūm Bedros’a edâya iktidârım olmayıp taksîte tâlib olduğumda mezbûr Bedros dahi târih-i kitâbdan her otuz gün tamamında dörder yüz akçeden [132b] sekiz yüz yetmiş gün tamamına değin on bir bin altı yüz akçesin verip bâkīsi olan iki yüz seksen akçesin dahi müddet-i mezbûre tamamından on beş gün tamamında edâ ve teslîm etmek üzere beni taksît ve ben dahi kabûl eylemişimdir suâl olunup takrîri tahrîr olunmak murâdımdır dedikde gıbbe’s-suâl mezbûr Bedros cevâbında fi’l-vâki‘ merkūm Haçok zimmetinde olan on bir bin sekiz yüz seksen akçeyi vech-i muharrer üzere taksît eylediğini ikrâr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Abdi b. Hüseyin, Mehmed b. Ramazan, Veli b. Mahmud, Hızır b. Mehmed, Mustafa b. Ahmed ve gayruhum.