İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 802 Hüküm no: 972 Orijinal metin no: [132b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Osman’ın çörekçi fırınını Zağarcıbaşı Hüseyin Ağa b. Ali’ye sattığı Mahmiye-i İstanbul’da Çoban Çavuş mahallesinde sâkin Mehmed Çelebi b. Osman meclis-i şer‘-i hatîrde yeniçeri ocağından zağarcıbaşılık mansıbı ile şeref-yâb olan fahrü’l-emâcid ve’l-ekârim câmi‘ü’l-mehâmid ve’l-mekârim işbu kitâbın sahibi el-Hâc Hüseyin Ağa b. Ali tarafından ikrâr-ı âti’z-zikri tasdîka vekîl-i şer‘îsi olan fahrü’l-emâsil Mustafa Yazıcı b. Mehmed mahzarında tâyi‘an ikrâr ve takrîr-i kelâm edip akd-i âtî sudûruna dek silk-i mülkümde münselik olup mahmiye-i mezbûrede Laleçeşme karşısında vâki‘ iki tarafdan Mustafa Ağa mülküne ve bir tarafdan Haffâf Mehmed Bey mülküne ve bir tarafdan tarîk-i âmma müntehî ve mahdûd bir bâb çörekçi fırınını mûmâ-ileyh el-Hâc Hüseyin Ağa’ya doksan bin râyic fi’l-vakt akçeye bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûru bi’t-tamam ve’l-kemâl yedinden alıp kabz eyledim ba‘de’l-yevm zikri sebk eden çörekçi dükkânı mûmâ-ileyh el-Hâc Hüseyin Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırr-ı mezbûru kelimât-ı muharreresinde vekîl-i mezbûr Mustafa Yazıcı bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-akrân Mehmed Ağa b. Sinan 26. [bölü]k, Ahmed Çelebi b. Mehmed Müezzinzâde, Mustafa Çelebi b. Yusuf, Hasan Çelebi b. Salih el-yesârî, Ahmed Beşe b. Mehmed Beşe 24. [bölük], İbrahim Beşe b. Malkoç 24. [bölü]k, Halil Beşe b. Şaban 24. [bölü]k.