İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 803 Hüküm no: 973 Orijinal metin no: [132b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım bt. Davud Paşa’nın vakıf arsası üzerindeki mülk menzilini Mustafa Efendi b. Mahmud ile kız kardeşi Rabia’ya sattığı Husûs-ı âti’l-beyânın mahâllinde tahrîri iltimâs olunmağın kıbel-i şer‘-i mutahharadan Mevlânâ Kehlî Mahmud Efendi irsâl olunup ol dahi mahmiye-i İstanbul’da el-Hâc Hasan mahallesinde sâkine fahrü’l-muhadderât zahru’l-muvakkarât tâcü’l-mestûrât Fâtıma Hanım bt. el-merhûm Davud Paşa’nın menziline varıp zeyl-i vesîkada isimleri mastûr olan Müslimîn huzûrunda akd-i meclis-i şer‘-i şerîf etdikde mezbûre Fâtıma Hanım meclis-i ma‘kūd-ı mezbûrda işbu bâ‘isü’l-kitâb kendi tarafından asâleten ve li-ebeveyn kız karındaşı Râbia tarafından şirâ ve def‘-i semene vekîl olup mezbûrenin zâtını ma‘rifet-i şer‘iye ile ârifân Abdullah Efendi b. Mahmud ve Salih Beşe b. Şaban şehâdetleriyle vekâleti sâbite olan mefharu’l-müderrisîni’l-kirâm Mustafa Efendi b. Mahmud mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Bali mülküne ve bir tarafdan Muharrem Ağa mülküne ve bir tarafdan Keçeci Mehmed mülküne ve bir tarafdan tarîk-i âmma müntehî arsasının senede merhûm Akşemseddin Vakfı’nı iki yüz kırk akçe mukāta‘a-i kadîmesi olan arsa-i merkūmenin üzerine kendi mâlımla iştirâ eylediğim iki bâb fevkānî oda ve bir sofa ve dehliz ve bir kenîf ve tahtânî bir bâb oda ve ahır [133a] ve kenîf ve cüneyneyi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık dokuz yüz esedî guruşa tarafeynden îcâb ve kabûlü hâvî mezbûr Mustafa Efendi ile müvekkile-i mezbûre Râbia Hatun’a bey‘-ı bâtt-ı sahîh-i şer‘î ile bey‘ ve teslîm edip ol dahi asâleten ve vekâleten iştirâ ve kabûl ve tesellüm eyledikden sonra arsa-i mezbûreyi dahi izn-i mütevellî ile yüz esedî guruş bedel mukābelesinde merkūm Mustafa Efendi ile müvekkile-i mezbûre Râbia’ya ferâğ ve tefvîz edip ol dahi asâleten ve vekâleten tefevvüz ve kabûl eyledikden sonra bedel-i mezbûr yüz guruş ile semen-i merkūm dokuz yüz guruş ki cem‘an bin esedî guruş mezbûr Mustafa Efendi yedinden tamamen ahz u kabz eyledim ba‘de’l-yevm menzil-i mahdûd-ı mezbûr merkūm Mustafa Efendi ile müvekkile-i mezbûre Râbia Hatun’un mülk-i müşterâları ve arsa-i merkūme hakk-ı müfevvazleri olmuşdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mefharu’l-kuzât Sefer Efendi b. Bali, el-Hâc Mustafa Ağa b. Şaban, Mehmed Ağa b. İbrahim, Karakaş Mehmed Beşe b. Sinan, el-Hâc Murad b. Osman.