Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 244 Hüküm no: 269 Orijinal metin no: [52b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırım Hanı Adil Giray’ın veziri iken katledilen İslam Ağa’nın varislerinden Neslihan ve Mehmed Ağa’nın Yusuf Paşa aleyhindeki alacak davasında anlaşma sağlanması El-emru kemâ zükira fîhi Mahmiye-i İstanbul’da Nahılbend mahallesi ahâlîsinden olup bundan akdem Kırım Hanı Adil Giray Han’ın vezîri iken katl olunan merhûm İslam Ağa b. Sefer Gāzî Ağa’nın verâseti vâlidesi Neslihan Hatun bt. Kaplan Ağa ve sulbî oğulları Haşim Bey ve Halil Bey’e münhasıra olup ba‘dehû mezbûr Halil Bey dahi vefât edip verâseti li-ebeveyn karındaşı mezbûr Haşim Bey’e münhasıra olup ba‘dehû mezbûr Haşim Bey dahi vefât edip verâseti li-ebeveyn ammi Mehmed Ağa’ya münhasıra olduğu şer‘an sâbit oldukdan sonra mezbûre Neslihan kendi tarafından asâleten ve mezbûr Mehmed Ağa tarafından husûs-ı âti’l-beyâna vekîl olup vekâleti bi-mâ-hüve tarîkı’s-sübût şer‘an sâbit oldukdan sonra vekâleten meclis-i şer‘de sâbıkā Özü Paşası olan emîrü’l-ümerâ Yusuf Paşa tarafından husûs-ı âti’l-beyâna vekîl olup vekâleti bi-mâ-hüve tarîkı’s-sübût şer‘an sâbite olan Ali Bey b. Allahverdi nâm kimesne mahzarında ikrâr ve takrîr-i kelâm edip merhûm-ı mezbûr vilâyet-i Rumili’nde Akkirman kasabası kurbünde vâki‘ çiftliğinde olan bin guruş kıymetli bin re’s koyununu paşa-i mûmâ-ileyh bi-gayr-ı hakkın kabz ve istihlâk etmekle bundan akdem zikr olunan koyunların kıymetlerini paşa-i mûmâ-ileyhden da‘vâ etdiğimde ol dahi dört yüz elli [53a] re’s koyunu vech-i muharrer üzere kabz ve istihlâkını ikrâr mâ‘adâ inkâr etmekle muslihûn tavassut edip paşa-i mûmâ-ileyh ile beynimizde dört yüz elli guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört yüz elli esedî guruşu paşa-i mûmâ-ileyh yedinden tamâmen ahz u kabz edip husûs-ı mezbûra müte‘allıka âmme-i da‘vâdan paşa-i mûmâ-ileyhin zimmetini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-Recebi’l-mürecceb sene 1081. Şuhûdü’l-hâl: Mehmed Çelebi b. Abdullah kethüdâ-yı muhzırân, Mustafa Çelebi b. el-Hâc Ahmed, İbrahim Çelebi b. Ahmed, Şükrullah Bey b. Mustafa.