İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 804 Hüküm no: 974 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed Çavuş’un mülk menzilini Belgrad eski kadısı Mustafa Efendi b. Hasan’a sattığı Sâbıkā Diyârbekir beylerbeyisi olan emirü’l-ümerâ’i’l-kirâm kebîrü’l-küberâ’i’l-fihâm Mehmed Paşa’nın dîvân efendisi olan umdetü erbâbü’t-tahrîr ve’l-kalem İbrahim Efendi b. Mehmed Çavuş tarafından zikri âtî menzili bey‘ ve kabz ve semene vekîl olup İbrahim Beşe b. Abdullah ve el-Hâc Ebûbekir b. Hasan şehâdetleri ile şer‘an vekâleti sâbite olan mefharu’l-a‘yân Ali Efendi b. Hamza meclis-i şer‘-i şerîf-i enver ve mahfil-i dîn-i münîf-i ezherde işbu kitâb-ı sıhhat-nisâbın sahibi sâbıkā Belgrad kādısı olan umdetü’l-mevâliyi’l-izâm Mustafa Efendi b. Hasan tarafından ikrâr-ı câ’i’z-zikri tasdîka sâbitü’l-vekâle vekîl olan mefharu’l-müderrisîni’l-kirâm Mehmed Efendi b. Zülfikar mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp müvekkilim mezbûr İbrahim Efendi’nin silk-i mülk-i sahîhinde münselik olup mahmiye-i İstanbul’da Nuri Dede mahallesinde vâki‘ bir tarafı aşçıbaşı mülküne ve bir tarafı Kara Bey Vakfı’na ve bir tarafı Penbeci Davud menziline ve bir tarafı tarîk-i âmma müntehî dâhiliyesi üç bâb fevkānî oda ve üç sofa ve bir tahtanî matbah ve bir kiler ve bir mağsel ve zât-ı eşcâr-ı müsmire ve gayr-ı müsmire hadîka ve bi’r-i mâ ve kenîfi ve hâriciyesi bir bâb fevkānî kebîr oda ve bir sagīr kahve odası ve tahtında bir oda ve bir ahır ve bir kenîfi müştemil menzili cemî‘ tevâbi‘i ve levâhıkı ile müvekkil-i mûmâ-ileyh Mustafa Efendi’ye vekâlet-i mahkiyem hasebiyle bâtten iki yük elli bin akçeye bey‘ ve teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûru vekâleten müşârün-ileyh Mustafa Efendi yedinden ahz u kabz eyledim ba‘de’l-yevm menzil-i mahdûd-ı mezbûr mûmâ-ileyhin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Ağa b. Hacı Ekmel, el-Hâc Süleyman b. ( ) kazganî, Mustafa Ağa, Mefharu’l-eimme Mehmed Efendi, Umdetü’l-müderrisîni’l-kirâm Mustafa Efendi, Ali Çelebi, Mahmud Çelebi.