İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 804 Hüküm no: 975 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kirko v. Andriya’nın Yani v. Paşkalom’da olan alacağının ikrar edilen kısmı ödenerek inkâr edilen kısmının ispatı için süre verilmesi Mahmiye-i İstanbul’da bakkāl tâifesinden Kirko v. Andriya nâm zimmî meclis-i şer‘de Yani v. Paşkalom nâm zimmî muvâcehesinde üzerine da‘vâ ve takrîr-i kelâm edip mezbûr Yani’nin Navluncu Kara Mehmed ile bezirci Hasan Beşe nâm kimesnelere beş bin sekiz yüz akçe deynine emri ile kefîl olduğumdan sonra mezbûrân hakları olan beş bin sekiz yüz akçeyi mezbûr Yani’den alamamağla kefâletim hasebiyle almışlar idi el-hâletü hâzihî ben dahi mürâca‘at edip [133b] meblağ-ı mezbûru merkūm Yani’den taleb ederim suâl olunsun dedikde gıbbe’s-suâl mezbûr Yani cevâbında bundan akdem mezbûr Kara Mehmed’e üç bin üç yüz akçe ve bezirci olan merkūm Hasan Beşe’ye altı yüz akçe ki ikisine cem‘an üç bin dokuz yüz akçe deynim olup emrim ile mezbûr Kirko meblağ-ı mezbûra kefîl olmağla kefâletine binâen meblağ-ı mezbûru merkūm Kirko’dan almaları ile mezbûra üç bin dokuz yüz akçe deynim vardır deyip üç bin dokuz yüz akçe deyni olduğunu ikrâr mâ‘adâ olan bin dokuz yüz akçeyi inkâr eyledikde müdde‘î-i mezbûrdan ziyâdeye beyyine taleb olundukda ityân-ı beyyine için istimhâl etmekle mehl-i şer‘î ile imhâl olundukdan sonra ikrârı mûcebince meblağ-ı mezbûr üç bin dokuz yüz akçeyi merkūm Kirko’ya edâya mezbûr Yani zimmîye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-kâtib, Abdi Çelebi b. Hüseyin el-muhzır, Keşfî Mustafa Efendi, Baba Rasûl b. Rıdvan.