İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 805 Hüküm no: 976 Orijinal metin no: [133b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Minas’ın Habbaz Haçador’un kendisine emanet ettiği parasının haramiler tarafından gaspedildiğine yemin ettiği Mahmiye-i İstanbul’da Firuzağa fırınında habbâz olan Haçador v. ( ) nâm zimmî mahfil-i kazâda işbu bâ‘isü’s-sifr İsak v. Minas nâm zimmî mahzarında üzerine takrîr-i da‘vâ edip târih-i kitâbdan altı ay mukaddem mezbûr İsak’a evime îsâl eyle deyü otuz yedi riyâlî guruş teslîm edip ol dahi vech-i muharrer üzere yedimden ahz u kabz eyledikden sonra meblağ-ı mezbûru evime îsâl etmeyip kendi mesârifine sarf ile istihlâk eylemişdir hâlâ suâl olunup meblağ-ı mezbûr[un] alıverilmesi matlûbumdur dedikde gıbbe’s-suâl mezbûr İsak cevâbında fi’l-vâki‘ müdde‘î-i mersûm vech-i mübeyyen üzere otuz yedi guruşu evine îsâl için yedime teslîm ben dahi ahz u kabz etmiş idim lâkin Tokad ile Turhal Hanı mâbeyninde giderken harâmîler basıp benim cemî mâlım ile meblağ-ı mezbûru dahi ahz eylediler deyicek mezbûr İsak’ın yedinde emânet olup yemîn ile müsaddak olmağın meblağ-ı mezbûrda te‘addî ve tecâvüzü olmayıp üzerine reddi lâzım gelmediğine mersûm İsak’a yemîn teklîf olundukda ol dahi alâ-vechi’l-mesûl yemîn billâhillezî enzele’l-İncîle alâ-İsa aleyhisselâm etdikden sonra müdde‘î-i mezbûr bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Veli b. Mahmud, Mehmed b. Hüseyin, Baba Rasûl b. Rıdvan, Şükrullah b. Mustafa.