İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 806 Hüküm no: 977 Orijinal metin no: [133b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun tarafından vakıf arsa üzerine bina olunup vakfedilen menzile Ali Çelebi b. Hacı Mahmud’un mütevelli tayin olunduğu Mahmiye-i İstanbul’da Akşemseddin mahallesinde vâki‘ arsasının senede merhûm Rum Mehmed Paşa Vakfı’na on bir akçe mukāta‘a-i kadîmesi olup binâsı merhûme Âişe Hatun nâm sahibetü’l-hayrın mahalle-i mezbûre imâmına vakf ve gallesini imâm-ı mezbûra şart eylediği bir tarafı el-Hâc Hasan mülkü ve bir tarafı Ömer Bey tasarrufunda olan vakıf menzil ve iki tarafı tarîk-i âmma müntehî menzilin mütevellîsi olmayıp bir mütevellî nasbı lâzım gelmeğin işbu bâ‘isü’l-kitâb Ali Çelebi b. el-Hâc Mahmud nâm kimesne müstakīm ve dîndâr ve her vechile tevliyet uhdesinden gelmeğe kādir kimesne olmağın merkūm Ali Çelebi taraf-ı şer‘den merkūme Âişe Hatun Vakfı’na hasbî mütevellî nasb ü ta‘yîn olundukda ol dahi tevliyet-i merkūmeyi kabûl ve hizmet-i lâzımesini edâya tahhüd etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-emâsil ve’l-akrân Mustafa Efendi, Ahmed Ağa b. Davud, Hüseyin Efendi b. Abdülvehhab, Halil Bey b. Abdullah, Hüseyin Çelebi b. Hacı Mahmud, Muslı Beşe b. İbrahim, Mehmed Efendi b. Abdullah el-müezzin, Himmet Beşe b. Ali, Ahmed Çelebi b. el-Hâc Hasan, Hüseyin Bey b. Mehmed, Ahmed Halîfe b. Mustafa, Mustafa Beşe b. Hüseyin.