İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 806 Hüküm no: 978 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Mehmed’in oturduğu vakıf menzilin oturma hakkını Ali Bey b. Osman’a bedeli karşılığında devrettiği Mahmiye-i İstanbul’da Şeyh Süleyman mahallesinde sâkine Rahime bt. Mehmed nâm hatun meclis-i şer‘-i hatîrde hâfızü’l-vesîka Ali Bey b. Osman nâm kimesne mahzarında ve mahmiye-i merkūmede hâlâ Medîne-i Münevvere Evkāfı mütevellîsi Cafer Ağa tarafından husûs-ı câ’îye vekîl olan evkāf-ı merkūme câbîsi Osman Bey b. Ahmed Efendi muvâcehesinde tav‘an ikrâr ve takrîr-i kelâm edip bundan akdem Mustafa Bey b. Abdüsselam nâm sahibü’l-hayr mahalle-i merkūmede vâki‘ bir tarafı Hasan Çelebi mülküne ve bir tarafı Nezir Ağa mülküne ve bir tarafı Mustafa Ağa mülküne ve bir tarafı tarîk-i âmma müntehî büyût-ı adîdeyi müştemil mülk menzilini vakf ve süknâsını evvelâ kendi nefsine ba‘de vefâtihî evlâdına ba‘de’l-inkırâz gallesini Medîne-i Münevvere fukarâsına şart ve ta‘yîn ber-minvâl-i muharrer vakfiye muharrer (tahrîr) etdirmişidi el-hâletü hâzihî yedimde olan vakfiye-i ma‘mûlün-bihâ nâtıka olduğu üzere ben evlâd-ı vâkıfdan olup sinn-i …? dâhil olmağla evlâdiyet bende nihâyet bulup benden sonra Medîne-i Münevvere Vakfı’na intikāl edeceği yanımda müte‘ayyin olduğu ecilden şart-ı vâkıf üzere menzil-i mezbûrede sâkine iken harîk-i kebîrde muhterik olup arsa-i sırfa kaldıkda vakıfda ve bende binâya müsâ‘ade olmamağla hakk-ı süknâmı yedi bin akçe bedel mukābelesinde mütevellîsi izni ile mezbûr Ali Bey’e ferâğ ve tefvîz ol dahi ber-minvâl-i muharrer tefevvüz ve kabûl edip bedeli olan meblağ-ı mezbûr yedi bin akçemi yedinden alıp kabz eyledim min-ba‘d mezbûr Ali Bey menzil-i mezbûru emsâli tasarruf eylediği gibi mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-Burûsî, el-Hâc Mehmed b. Kadri el-yesârî, Keşfî Mustafa Efendi el-kâtib, Baba Rasûl el-muhzır, Abdi Çelebi el-muhzır.